Friendship Between Ceremony and Waste
This is a Response to the Sampah Upacara wikithon
Upakara miwah leluu nenten wenten tios sakadi pasemetonan sane dahating raket. Ring dija ja wenten yadnya sane nganggen upakara, pastika drika wenten leluu. Sayan jangkep tur ageng upakara sane katur, pastika sayan ageng raris leluu sane kamedalang. Parindikan kadi asapunika katah kapanggih ring sahaning pura ring wewidangan Bali. Pikobet punika wantah medal sangkaning pikarsa krama Baline sane seneng ngutang leluu ring Pura. Yening makta aturan, pastika kramane ngenahang canang aturane ring asagan pura pinaka jatu sampun polih ngaturang bhakti. Sapunika taler riwusan muspa pastika leluu sisa sarana pamuspan pacang kalepotang ring natar pura. Malih siki, riwusan matumbasan miwah nunas pica ring pura, akeh pisan sane ngura leluu sakita arep sane mawinan pura duene ocem. Nepasin kawentenane punika, iraga pinaka krama Bali patut eling ring raga. Yening sampun wusan ngaturang sembah, sapatutne leluu pamuspan punika kapupulang tur kagenahang ring tong sampah. Asapunika taler risampune puput ngaturang upakara utawi canang ajuman saha sodan, sampunang malih ngenahang canang lungsuran ring asagan pura. Kaping tiga, iraga pinaka pamedek sane subakti ring Sesuhunan patut ngraksa karesikan parahyangan Ida antuk nenten nglepotang leluu sisa matumbasan utawi sisa nunas pica ring Pura. Yening makasami sampun kalaksanayang, pastika juru sapuh ring pira nenten pacang merah meruh saha paiketan pantaraning upakara miwah leluu sane sampun makilit puniki prasida gelis kapasahang.
- Category
- general
- Affiliation
- Br. Dangin Labak, Singakerta, Ubud, Gianyar
- Age
- 22-30
Enable comment auto-refresher