.jpg)
Rahinane mangkin gering agung Covid-19 durung matilar saking mrecapadane. Virus puniki sampun mabencah dados makudang-kudang varian. Pemerintahe kantos mangkin sampun mautsaha ngamedalang kebijakan mangda parajanane nenten keni panglahlah gering agung Covid-19. Sakewanten nenten makasami kebijakan prasida katrima olih parajanane santukan kawentenan perekonomian sane nyansan sukil. Mangkin pemerintah pusat malih nitahang pemerintah daerah utamannyane ring Jawa miwah Bali mangda nglaksanayang PPKM utawi Pemberlakuan Pembatasan Kegiatan Masyarakat ring bulan Juli. Punika santukan ring wewidangan Jawa-Bali ngakehang parajana sane keni panglahlah Covid-19.
Mangkin PPKM punika yening manut ring manah titiang nenten ja kebijakan sane pinih becik. Santukan akeh kegiatan parajanane sane puputnyane nglangkungin galah sane sampun kacumawisang. Sekadi titiang pinaka mahasiswa. Mangkin titiang sedeng ngurus surat-surat anggen tugas akhir. Sakewanten staff ring akademik patut makarya saking jero, puri, griya soang-soang. Nyansan sue titiang ngurus surat-surat sakadi punika. Sapatutnyane yening pemerintah meled kayunnyane jagi nepasin panglahlah Covid-19, vaksiasi patut gelis kamargiang. Krana ring vaksin punika taler wenten masa kadaluwarsa. Mangda nenten benjang pungkur ri sampune akeh pemerintah numbas vaksin sakewanten akeh sane kadaluwarsa. Titiang precaya ri kala sampun mavaksin, imun ring anggan parajanane jagi nincap. Kasarengin antuk panglaksana protokol kesehatan sane nyansan trepti muah jemet maolah raga, pastika nyansan kidik parajana sane keni Covid-19.
Enable comment auto-refresher