Summary
In English
In Balinese
Liang gati kenehne Luh Putri krana nyidaang malukat ka Tirtha Empul. Suba uling pidan mapangapti apang maan muspa ngaturang bakti ring Bhathara-Bhathari sane malingga di Tirtha Empul. Sebengne bingar. Torise tepukina ngantre lakar malukat. Ada toris uli Eropa, uli Afrika apa buin turis Asia. Ada masi uli dura gumi Bali. Yehe rasanga len gati tusing patuh buka yeh ane makecor di jumahne. Di jumahne yeh uli krane pesune. Yen di Tirtha Empul, uli klebutane pusune. Klebutane tetep mumbul yadiastun panes terak. Ia masi bareng ngantre apang maan ngrasang dingin. Mara maceleban suba ngilgilang awakne. Kipekina adinne. Sing dingin? Apa sing dingin? Yeh uli klebutane. Uli beten gumine sinah dingin gati. Luh Putri kedek. Ia maceleban sinambi melusin bokne ane selem malengis. Bokne gumanti luung tumbuhne. Memene pepes ngaenang ambuh. Tusing nganggo sampo dogen. Kanti makejang pancorane maan panjusina. Kenehne sayan tis rasanga. Ia gending-gending mara suud malukat. Torise sayan ngliunang dogen. Ia angob ningalin torise alah daut kenehne ka Tirtha Empul. Toris dogen demen malukat. Iraga masi apang demen malukat. Ia uli joh mai malukat. Iraga tumben ajaka mai teken i meme? keto Luh Putri ngrieng di kenehne sambilanga melahang panganggone. Biin jebosne saget ada anak makesiab, mara ada lelipi ulung uli punyan kayune. Dedehanga lelipine kanti ka sisi. Me, ngujang tusing malukat? Luh Putri matakon. Meme suba pepes malukat buina dingin gati. Malukat tusing dini dogen. Liu tongose malukat. Pepes malukat? Gaya gati i meme. Liu Me? Dija dogen tongos malukat, Me? Malukat dadi di pacampuhan utawi di segara. Yen ento suba pepes. Ane buka kene, tumben Me. Memene ngajak Luh Putri ka jeroan lantas muspa ngrastitiang awakne. Ngrastitiang leluhurne apang sayan melah. Suud muspa ia ningalin telaga tongos mumbul klebutane. Meee, ada be julit gede. Miih gede gati. Awakne elag-elog buka anake ngigel. Di klebutane mula liu ada be julit. Bisa gati buka mabulu ngenahne. Ento panakne di durine. Tresna gati teken memene. Luh masi sayang teken Meme. Dadi pancingin Me? Memene kenyem. Be julit due. Tusing dadi pancingin. Patut piara melahang. Druwen nyen Me? Druwen Ida Bhathara. Patut lestariang. Patut melahang apang sayan liu ambahan yehe. Luh Putri sayan ngon ningalin Tirtha Empule. Ia mapangapti apang nyidaang tangkil manian ngajak timpal-timpalne.
In Indonesian
Enable comment auto-refresher