Summary
In English
In Balinese
Kacerita di desa anu ada anak muani tua tur pacul madan Pan Mangut. Sawai-wai gagaene tuah dadi panyakap di carik Jro Kelihan Desane. Geginan Pan Mangut tuah ngitungang gaen di carike minakadi matekap, mamula, ngiskis, ngembakang yeh, ngulah kedis, nganteg manyi. Makejang ento suba kaserahin olih Jro Kelihan Desa marep Pan Mangut. Yening suba ada hasil, Pan Mangut maan duman aperapat. Sisane kaserahang marep Jro Kelihan Desa. Sujatine Pan Mangut petani jemet tur anteng. Tuara taen ia ngae munyi bobad apabuin malaksana corah. Ento makada Jro Kelihan Desa sayang teken Pan Mangut. Kacerita jani Jro Kelihan Desa maan meli sampi akit lua kalawan muani. Sampine ento lakar kaubuh apang ada anggon nenggala carik mani puan yen tuun magae. Jro Kelihan Desa lantas nunden Pan Mangut ngadas sampine. Jro Kelihan Desa ngemaang semaya teken Pan Mangut, manian yening sampine ngelah panak mara aukud, ento dadi gelah Pan Mangut. Yening sampine manakan kaping pindone, dadi gelah Jro Kelihan Desa. Yening buin manakan, ditu mara dum ajak dadua. Keto semayane Jro Kelihan Desa teken Pan Mangut. Girang kenehne Pan Mangut, jani ia masih ngangon sampi. Sabilang semengan tur nyanjaang Pan Mangut ngaritang sampine padang. Yening suba sanja sampine kayehang di sisin tukade, suba keto lantas celepanga ka badane tur kagaenang idu-iduan. Pan Mangut apik pisan ngangon sampine, sambila ngacep apang enggal ngelah godel. Makelo-kelo Pan Mangut magae di carike sambila ngangon sampi. Jani suba sampine manakan. Liang pisan kenehne Pan Mangut ngelah godel, diastun tuah aukud sakewala maaji pisan. Godele ento bulune alus gading, pawakane lemuh sakewala kerep pisan. Tindakane lincah tur matangar. Pan Mangut sayang pisan teken godelne ento. Sabilang semengan Pan Mangut ngaritang padang lakar amah-amahan sampi miwah godelne. Yening tuara maan ngarit padang, kanggoanga les gedebong dogen jangina di pangedongane. Kendel atine Pan Mangut ningalin sampi miwah godelne ngamah. Sambila ngedasin badan sampine ane bek misi tai, Pan Mangut ngusu-ngusuin godelne. Godelne ento masih jemet teken Pan Mangut tusing taen rengas. Sedek keto iseng atine Pan Mangut nyangkol godelne tur tegena di duur bahune. Godele ento tileh jemet diastun kategen baan Pan Mangut. Keto masih Pan Mangut demen pisan negen godelne. Kacerita sabilang wai keto dogen gagaene Pan Mangut. Suba suud ngencanang carik ngelantas ia ngarit tur nuju badan sampine. Suud ngemaang ngamah godel miwah sampine, lantas godelne tegena akejep. Keto dogen sabilang wai. Kanti godele ento suba dadi gede, Pan Mangut enu ngidaang negen. Liu anake ngon ningalin Pan Mangut ngidaang negen sampi. Ajin amonto sampine sinah baat pisan, tegen jelema dasa diri ulesne mara matingtingan. Ne jani jelema tua buka Pan Mangut ngidaang negen, aduh...., geles gaen ento Tusing buungan liu anake ngaden Pan Mangut jelema sakti, keto masi liu anake ngaden Pan Mangut liu ngelah paica gagemet sasabukan. Sakewala sakancan pakrimik krama desane ento katungkas baan Pan Mangut. Saget ada anak makita matakon kengken unduke dadi Pan Mangut bisa ngelah bayu gede amonto, apake mirib ada rahasiane. Pan Mangut lantas ngomong, Icang tusing ngelah kabisan apa-apa. Icang uli mara godel nganti dadi amonto sampine ento kategen. Ento ngranayang icang suba biasa negen ubuhan icange ento. Unduke ene satmaka cihna. Lamun iraga biasa nyemak gagaen, diastun amongken baat gagaene ento, lamun suba biasa jemak sinah lakar tusing marasa baat. Ento awinan icang mapiteket, eda pesan lengit magagaenan. Gagaen yening suba jalanin lakar tusing marasa baat Bengong makejang krama desane madingehang baosne Pan Mangut. Mirib karesep apa ane dadi isin baose ento.
In Indonesian
Enable comment auto-refresher