Indonesia kawangun antuk makudang-kudang pulo mawit saking Sabang nyantos ka Merauke sane akeh meduwe keanekaragaman. Silih sinunggil inggih punika pulo Bali. Pulo sane sampun kasub ka dura negara antuk keasrian alamnyane, adat istidatnyane nyantos sane pinih utama punika wantah rasa toleransi sane mabuat pisan ring warga Baline sami.
Ring Bali para janane sami saling asah, asih lan asuh salunglung sabyantaka menyama braya yadiastun mawit saking ras, suku nyantos agama sane pada lian. Indike punika prasida kacingakin ring silih sinunggil wewangunan genah ngaturang bakti saking pabinayan agama ring Indonesia sane magenah ring area Puja Mandala. Drika kawangun Pura anggen umat Hindu, Masjid anggen umat Islam, Gereja anggen umat Kristen, lan Vihara anggen umat Buddha.
Sane mangkin, napi sane patut kalaksananyang mangda jagat Baline setate kukuh lan adung sekadi punika?
Mangda jagat Baline setate rukun, iraga sareng sami patut ngrajegang parilaksana sandya utawi sakadi anake mebaos mangkin bersatu . Mawinan ring kasujatiane yadiastun iraga saling mabinayan keyakinan nanging tetujonnyane wantah asiki inggih punika Ida Sang Hyang Widhi Wasa utawi Tuhan yang Maha Esa. Madasar antuk parilaksana sandya, iraga sampun sepatutnyane saling asah, asih lan asuh sareng semeton sane lianan. Setate eling teken semboyan iraga dados bangsa Indonesia inggih punika, Bhineka tunggal ika , sane maarti yadiastun iraga malianan nanging iraga tetep siki. Santukan pabinayan utawi kenekaragaman punika sane ngranayang iraga rumaket.
Iraga dados yowana Bali sampun sepatutnya sareng-sareng ngeraketang rasa menyama braya sareng sami yadiastun iraga rauh saking wewidangan sane malianan miwah meduwe agama lan keyakinan sane pada lian. Santukan kasujatiannyane pabinayan punika wantah saling nagingin. Pabinayan punika saling ngicenin, miwah pabinayan punika pada nindihin. Sampunang pabinayan punika kaanggen kapiangbeng ring sajeroning iraga ngemargiang swadarma ring gumine, nanging indike sampun sepatutnyane kaanggen sarana sane jagi pacang nyikiang raga.
Enable comment auto-refresher