Om swastyastu semeton. Dumogi sareng sami kenak lan rahayu nggh. Setata jagra mangda kenak , jek sue pisan sampun sekadi puniki kawentenan jagate krana pandemi covid-19. Ngawitin saking sasih maret kantos mangkin durung taler janten pandemi puniki jagi usan. Manut sane wacen titiyang ring sosial media, kebaosang irika kocap wenten malih sane mewali keni positif covid-19 puniki. Wenten taler sane meboye ring awig-awig protokol kesehatan. Dewek titiyang preragan lan pasemetonan titiyang sampun nginutin punapi daging awig- awig protokol kesehatan punika, titiyang medal saking griya yening wenten pabuat sane kalintang dahat, titiyang taler medal nenten lali, ngangge masker, makte handsanitizer, makte lap utawi tissu basah. Setunggil titiyang mewali budal, nenten naenin lali titiyang mesiram, tur ngumbah pengangge sane anggen titiyang medal. Tiosan punika, titiyang taler nganutin awig-awig sane wenten ring kampus, sekadi kuliah online utawi daring, nyarengin Ujian Tengah Semester lan Ujian Akhir Semester taler online. Nanging sane rasayang titiyang yening kuliah online, wenten becikne wenten kaonne. Becikne molihang ilmu sakewanten titiyang meneng ring griya, kaonne ne nika nenten mersidayang kacunduk sareng dosen lan timpal-timpal. Sampun sue meneng ring griya kemanten. Timis-timis petang sasih, titiyang nenten ngerasayang sane mewasta inguh, utawi med, santukan titiyang ring griya medue kegiatan, tur titiyang ngawigunayang galah puniki anggen cande-cande, ngorti-ngorti sareng aji lan biyang. Tiosan punika titiyang taler medue ponakan nak alit wau matuwuh petang sasih, titiyang taler nyarengin ngempu ponakan titiyange. Tiosan punika, galahe puniki taler anggen titiyang melajah dados jadma anak istri sane luwih, titiyang melajah mejejaitan, tur sering nyareng-nyarengin biyang meratengan ring puwargan, irika sampun Sinambi titiyang melajah. Ten wenten sane kebaos med selami titiyang ring griya manten, galahe puniki jek anggen titiyang melajahang dewek mangde luwih. Titiyang meneng ring griya kemanten sampun seneng, santukan titiyang ngerumasayang kawentenan ring griya sane asri, bersih, tur makeh titiyang polih peplajahan sane anyar saking aji lan biyang, jek seneng pisan tiyang ring griya. Nanging Kawentenannyane sane sekadi puniki ngawinang, makeh sane mekarya ring hotel, lan restoran,dirumahkan , nenten ipun mersidayang mekarya, tiosan punika, pegawai-pegawai kantoran taler dirumahkan, mekarye ipun saking jeroan soang-soang. Perekonomian jek meweh pisan mangkin, makehan para aji biyang, meme bapa ngerumasayang pikayunan meweh antuk kawentenan jagat sekadi puniki , makeh taler mangkin sane madolan online, inggihan punika sekadi ngadol ajeng-ajengan, pengangge, masker, handsanitizer, miwah sane lianan. Gadget punika sane keanggen ngerereh pengupa jiwa riantukan sampun nenten medue pekaryan. Kantos sane mangkin jagi nyujur sane mewasta era new normal, yadiastun jagi kemargiang new normal, irage sareng sami, setata eling sareng awig-awig protokol kesehatan, setata nginutin napi daging nyane tur nenten dados meboye, niki wantah ngupadiyang mangde iraga sareng sami rahayu. Jek becik pisan yening sampun ring griya kemanten. Dumogi rahayu nggh semeton. Om Santi Santi Santi Om
Enable comment auto-refresher