Jagat Bali inggih punika silih sinunggil destinasi wisata sane sampun kaloktah ring sejebag jagate. Nyabran ngewarsa, akeh pisan para wisatawanne rauh ke jagat Bali gumanti melilacita kabecikan jagat baline taler kasenibudayannyane. Silih sinunggil genahe ring bali sane makueh medue obyek wisata inggih punika ring Bali sisi kelod, sane makuehan magenah ring wewengkon jagat Badung. Sakemaon tios ring punika makasami wenten taler gatra sane mapaiketan ring parisolah tamune, inggih punika pikobet indik wewengkon sane nenten becik rauh ring kemacetan sane ngawetuang manah ajerih pacang ngawetuang pikobet sane ngelantur taler sane pacang ngerusak kawentenan pariwisatane ring bali.
Kapertame mapaiketan ring akehnyane para tamu asing sane melaksana nenten becik bilih-bilih nenten nganutin uger-uger. Silih sinunggil sane anggen conto inggih punika wenten video sane nyinahang limang diri wisatawan asing sane malaksana nenten patut nganggen sepeda motor ngalintangin Simpang Dewa Ruci ring Badung taler nenten ngangge helm lan kwaca. Indike punika banget pacang ngewetuang baya ring anak tios sane ngelintangin margine punika. Sepatutnyane petugas kapolisian ngambil tindakan tegas ring sane madue rental punika sane nenten nguehin indik tata titi sane patut kamargiang ring marginne olih para wisatawan sane nyewa motor ipun. Raris masyarakat mangda kawehin pamekasnyane sane madue rental kendaraan mapetinget ring sane nyewa kendaraan ipun mangda setata tertib lan nganutin tata titi sane becik ring margine.
Sane kaping kalih mapaiketan ring pikobet sane metu sangkaning akehnyane wisatawan sane rauh ke Bali sering pisan ngewetuang sampah plastik lan mapanados palemahanne ten becik. Conto nyane Pantai Kuta silih sinunggil genah pariwisata ring Kabupaten Badung sane sampun kaloktah, sane patut pisan polih uratian sangkaning akehnyane sampah irika. Para tamu sane majemuh ring sisin pasihe sering pisan ngutang sampah sane ngerusak kawentenan pasir putih irika, tios ring punika sampah merupa plastik sane rauh saking restoran, kios, lan tamu sane tiosan taler keanyudang olih ombak mawastu medugdug irika ring pantai. Murdaning jagat sane medue wewidangan punika sepatutnyane nincapang kawentenan sarana pengolahan sampah antuk sarana anggen mupulang taler milah-milah, selanturnyane ngolah sampahe punika mangda genahe punika dados resik. Mangda masyarakat ring wewidangan punika sareng nyontoin para wisatawanne. Duaning para tamu nenten pacang prasida nganutin uger-uger sane patut yening masyarakat ring genahe punika taler maparilaksana ten patut.
Raris sane kaping tiga inggih punika indik kemacetan. Sayan-sayan nincapnyane kendaraan pribadi lan transportasi wisata sane ngewetuang kemacetan ring margi sane utama lan genah pariwisata tiosan, banget pisan mengganggu parawisatawanne. Margi utama parawisatawane minakadi ring jalan raya Kuta sering pisan macet sane ngewetuang pikobet ring margine nyujur pantai lan metulak saking pantai taler hotel. Mangda antar pemarginne ring sawewengkon jagad Badung, sepatutnyane pemerintah daerah nincapang koordinasi sareng polisi lalu lintas lan sane madue angkutan umum mangda prasida margine antar lan nyobiahang indik nganggen transportasi berbagi minakadi shuttle bus.
Antuk ngamargiang pamargi-pamarginne sane becik puniki gumanti Kabupaten Badung prasida ngamargiang pikobet sane wenten sane mapaiketan ring wisatawan, palemahan genah sane kotor sangkaning pariwisata, lan kamacetan. Pangupaya pemerintah, taler pamandu pariwisata sane medue usaha, lan masyarakat ring genah pariwisatane punika, pacang dados piranti nincapang kabecikan genah pariwisatane sane nglantur lan prasida ngeledangin iraga sareng sami.
Enable comment auto-refresher