Summary
In English
In Balinese
Lega pesan Putu Lestari mara lakar ajaka ka museum teken reramane. Uli ipidan meled nawang museum. Museum tusing nyimpen tetamian ane lawas-lawas dogen. Museum masi dadi anggon tongos mlajah. Mlajah indik ane gaena teken panglingsire ipidan. Ento nyihnayang panglingsire masi tetep mlajah apang ada tamianga. Patut tureksain apang tetep mawiguna. Sedeng melaha libur sekolahan, maan mlali ajak reramane. Reramane mula majanji di libur kenaikan kelase lakar ngajak Putu Lestari ka museum. Di sekolah, gurune pepes nyambat melahne mlajah di museum. Gurune nyambat ada museum Subak, ada museum Wayang, ada museum Keris muah ane len-lenan. Mirib ento ngranayang sangkan Putu Lestari mara ajakina mlalali ka museum buka sayutin kenehne. Semengan suba manjus. Ia uli dibine suba nyayagaang buku tulis lakar anggona nyatet ane ada di museum. Reramane demen ningalin panakne buka keto. Pa, dadi makelo gati? Bapane kenyem. Jani suba lakar majalan. Reramane ngidupang mobilne lantas majalan ka museum. Putu Lestari kipek-kipek ningalin anake di jalane. Tepukina mobile pasliwer saling pamaluin. Ada truk ngaba bias kanti buka anak ngangseg pajalane. Ada sepeda motor mamunyi gerung-gerung. Pa, gigis liun polusine jani? Saja pesan Tu. Sangkananga iraga patut urati teken gumi. Yen sayan liu buka kene sinah lakar sayan kebus gumine. Buina suba sayan langah punyan-punyan kayune. Neked di museum, Putu Lestari kenyem-kenyem. Ia lakar liu matakon teken patugas museume. Om Swastyastu, Pak. Dados tiang ngranjing? Keyem Satpam museume tumben ada anak cerik mamunyi alus. Lantas ajaka ka tengah. Paling kipekane Putu Lestari baan liu gati ada barang-barang kuno ane suba tusing taen tepukina. Ada buin gambar-gambar ane lawas gati. Limane iteh nulis. Bapane masi keto, moto-moto apang ada anggona panginget teken sentanane. Pak, liu anake mriki mlajah ka museum? Putu Lestari matakon. Liunan toris mriki. Liunan toris Pak? Artine, tiang masi toris. Putu Lestari kenyem. Yen di duranegara, biasa ngajak murid ka museum anggona mlajah. Yen iraga, langah ane buka keto. Madak manian apang liu buka Putu mlajah di museum. Museum ento tongos melah mlajahang awak apang nawang budaya leluhure. Putu Lestari masidakep. Ia makisi-kisi teken reramane. Kayang libur semesterane buin ka museum Pa, nah. Nah, kewala inget mlajah. Putu Lestari kenyem, sirahne usuh-usuhine teken bapane.
Pangawi: IBW Widiasa Keniten
In Indonesian
Enable comment auto-refresher