Literature 3S Pariwisata Bali: Membangun Kebijakan Mengurangi PHP dan Meningkatkan HPP di Masa Pandemi
- Title (Other local language)
- Photograph by
- Kemenparekraf
- Author(s)
- Reference for photograph
- https://pedulicovid19.kemenparekraf.go.id/siaran-pers-kemenparekraf-sosialisasikan-penerapan-protokol-chse-di-bali-dan-labuan-bajo-kepada-ekspatriat-india-yang-ada-di-indonesia/
- Subject(s)
- Reference
- Related Places
- Event
- Related scholarly work
- Reference
- Competition
- opini
Description
In English
In Balinese
Kesehatan pinaka widang sane pinih utama ring kauripan jadmane. Punika sangkaning kesehatan prasida ngametuang karya anggen ngelanturang pembangunan ring samian widang. Kawenten kesehatan taler kadadosang pinaka indikator ring sajeroning nuriksain kemajuan negara, lianan ring widang ekonomi lan pendidikan. Ring galah pandemi saking warsa 2020 nyantos mangkin, kawentenan pemerintah pinaka guru wisesa taler krama Baline kadirasa madue pilihan sane meweh pisan. Kawentenan pandemi sane ngamedalang wates ring para kramane mapupul ngamedalang kawentenan pembatasan, silih sinunggilnyane ring widang pariwisata sane kaanggen utsaha nincapang kawentenan kesehatan masyarakat mangda nenten keni pinakit covid punika. Nanging lianan ring punika, utsaha puniki taler sane ngranayang ekonomi ring Bali sayan rered. Punika sangkaning akehan krama Baline makarya ring widang pariwisata. Turmalih widang lianan minakadi pertanian taler kawantu saking kawentenan pariwisata, minakadi supplier jangan ka hotel utawi restoran. Ring ajeng pandemi, sakadi prasida kacingak ring sisin marga ring wewidangan pariwisata minakadi Nusa Dua utawi Denpasar, akeh prasida kapanggih krama pinaka pelaku pariwisata sane maadolan kaanggen ngruruh pangupajiwa. Nyantos mangkin, kawentenan punika taler sayan rered sangkaning daya beli masyarakat sane sampun rered lan kawentenan pembatasan ritatkala galah sane dados kaanggen maadolan. Taler wenten krama sane sampun budal ka kampung soang-soang sangkaning meweh ring rantauan. Ring manah titiang, kawentenan punika taler patut dadosang fokus saking pemerintah. Punika sangkaning kawentenan pertumbuhan ekonomi ring Bali warsa 2021 manut ring Bali Post nyantos minus 5,24 . Lianan ring punika, manah pelaku pariwisata mangda pemerintah nenten dados Pemberi Harapan Palsu PHP ring sajeroning mungkah pariwisata. Punika sangkaning, saking warsa 2020 krama Baline sampun kaicen isu-isu pamungkah pariwisata Bali majeng ring wisatawan internasional. Isu punika sampun saking sue, sane sering kaundur nyantos mangkin. Sangkaning punika, kawentenan pelaku wisata wantah prasida ngandelang wisatawan domestik. Taler sekadi mangkin sampun sayan rered sangkaning kawentenan kebijakan sane prasida ngamedalang pakeweh majeng ring wisatawan, minakadi syarat-syarat berkas uji test swab sane nincapang kawentenan prabea sane katelasang. Napi malih, nyantos Bali akehan genah wisatane sane tutup tur prasida ngranayang kramane nenten liang. Pelaku pariwisata ring Bali taler kabaos sampun akeh ngamedalang prabea sane kaanggen muat srana mangda genah pariwisata manut ring standar kesehatan antuk ngelaksanayang protokol CHSE Cleanliness, Health, Safety, and Environmental Sustainability lan ngelaksanayang 3M Nganggen masker, ngwacikin tangan, taler nyaga jarak ring genah soang-soang. Prabea punika sakadi kaaanggen ring pengadaan alat-alat minakadi thermometer lan washtafel taler srana kebersihan minakadi handsanitizer, sabun, desinfektan lan masker. Punika taler samian kramane ring widang pariwisata sampun kautamayang antuk kavaksin pinaka persiapan ring pamungkah pariwisata. Sangkaning punika, manah titiang pinaka krama sane meneng ring widang pariwisata, mangda isu-isu pamungkah punika nenten wantah dados PHP, nanging prasida kalaksanayang dados HPP Harapan Pelaku Pariwisata mangda kramane prasida mikolihang pendapatan saking pariwisata. Nenten je wantah krama kemanten, HPP punika taler kaaptiang ngewaliang pendapatan daerah sane mawit saking pajak hotel lan restoran PHR . Utsaha sane patut kalaksanayang dados kabaosang pinaka 3S, inggih punika Standar, Srana, lan Sidak. Standar sane kabaosang sakadi sane sampun kabuat inggih punika standar CHSE. Pemerintah utamanyane lembaga sane madue kawenangan mangda nureksain kawentenan punika, minakadi nglaksanayang audit ring kawentenan standar punika ring genah-genah pariwisata. Kawentenan standar punika taler madue kaitan ring kawentenan Srana, minakadi srana ngwacikin tangan utawi ngecek suhu sane sampun kawedar. Kawentenan kalengkapan punika prasida ngamedalang sertifikat pinaka bukti genah wisata punika sampun dados kabungkah. Taler sane pinih untat, mangda kalaksanayang sidak kaanggen srana pengawasan antuk kawentenan standar sane kalaksanayang olih pelaku pariwisata. Harapan pelaku pariwisata nenten ja akeh. Harapan punika wantah kepastian sangkaning para kramane sampun sue nyantosang mangda prasida makarya turmalih polih pendapatan. Taler nenten meweh ring sajeroning birokrasi. Yening sampun manut ring standar, mangda prasida antuk kalanturang ring sajeroning mungkah kawentenan pariwisata punika.
In Indonesian
Enable comment auto-refresher