Baya Asusila Sayan Nincap Ring Buleleng. Ring galahe mangkin Buleleng sering kawentenang antuk orti indik aksi asusila sane ngaonang krama ring Buleleng. Akeh kasus sane dados viral ring media sosial sakadi ring faceboook, instagram, tiktok miwah media sosial sane lianan. Sangkaning parilaksana sane nenten patut puniki pastika akeh pikobet sane pacang nibenin masa depan Buleleng. Pastika wenten pikobet sane patut kapuputang, pikobet punika mangda gelis wenten solusi sane mabuat pisan anggen ngajegang citra Buleleng sane luih, napi malih Buleleng kasengguh pinaka kota pelajar. Pihak sane mapaiketan sareng indike punika mangda gelis nampenin unduke punika. Antuk ngukuhang hukum sane adil majeng sang sane nglaksanayang parilaksana Asusila punika. Turmaning majeng ring petugas sane madue swadharma sistem kontrol mangda sayan nincap malih ngawasin panglimbak saha ngwatesin para krama numbas inuman sane nenten patut. Santukan unduke punika minabang prasida dados faktor pemicu parilaksana Asusila sakadi sang sane katiben sengsara kari keni pengaruh alkohol. Sang sane katiben kasengsaran patut taler kauratiang taler kajagaang. Pamerintah patut ngicenin sosialisasi utawi himbauan majeng ring para kramane indik parilaksana sane mabuat pisan mangda nenten nundung korban tindakan asusila, mangda korban nenten keni gangguan psikis sane sayan parah ri sampune keni pariindikan sane nenten becik sakadi tindakan asusila. Punika prasida dados silih tunggil utsaha pamerintah anggen ngwantu korban. Para sameton, titiang banget mapinunas yening wenten sameton sane lempas saking kapatutan, raris mangda wenten sameton sane ngwaliang ipun ka pamargin ipune sane patut. Mangdane sameton sane lempas prasida gelis kapatutang tur nenten sayan lempas. Samaliha sameton sami mangda nabdabang raga, yatnain ragane, mabuat ngeret indria, mangda sampunang sameton kantos keni gegodan. Solusi punika sane prasida kamargiang anggen nanganin parilaksana asusila sane ketah mamargi ring Buleleng. Duaning punika, iraga patut satata yatna, ring dija ja iraga magenah, tur yening wenten anak sane malaksana kadi asapunika, sampunang ajerih jagi ngortiang indike punika majeng anak lianan utawi pihak sane kapatutang.
Enable comment auto-refresher