Kuala Nekepin Bibih (I Wayan Kuntara)
From BASAbaliWiki
- Title
- Kuala Nekepin Bibih (I Wayan Kuntara)
- Year
- Related Places
- Writer(s)
- Photographer(s)
- Reference
- Photo Credit
- Video Credit
Sasukate pinungkan Covid-19 mrebehin jagat, samian krama saking alit kantos lingsir kaaptiang nganggen masker ri tatkala medal saking jero. Parindikan puniki becik kaanggen megatin wiadin ngalangin pinungkan Covid-19 pantaraning krama. Sane pinih dangan keni pinungkan Covid-19 puniki ketahnyane krama sane sampun lingsir. Pangeling-eling sakadi punika ngicenin panglalah majeng krama lingsir ring panepi siring sane swaginanyane akehan matatanduran ring carik. Karasayang engsek pisan makarya ring carik nganggen masker. Krama lingsir durung tatas uning ngawigunayang masker sane becik, apang kuala matekep dogen bibihe , wantah punika sane kauningin krama lingsir indik ngawigunayang masker. Napi malih masker sane sarahina kaanggen olih anak lingsir ka carik akehan nenten kagentosin yadiastun sampun daki. Sinah sampun ngelidin sema nepukin setra. Ngelidin Covid-19, manggihin pinungkan tiosan. Pikobet nganggen masker sayuakti parindikan sane dangan kalaksanayang, nanging katunaan krama lingsir ngresepin pinungkan covid-19 miwah rumasa tawah pisan yening nganggen masker ri tatkala matatanduran di carik. Pinungkan Covid-19 sayuakti abot pisan karesepin olih krama lingsir. Tan bina matulak pisan tekening swagina krama lingsir di panepi siring. Sujatinyane Covid-19 puniki ngawi iraga makasami buka siape sambehin injin. Minab sang sane rumasa wikan ring parindikan Covid-19 puniki taler nenten sujati resep tur uning indik pamutus sane becik anggen ngaonang pinungkan Covid-19. Nanging, pangaptin iraga makasami dumogi gelis matilar gering agung, mangda jagate nenten suung.
Enable comment auto-refresher