Sampah Utawi Mis Sane Nyemerin Wewidangan Pariwisata Om Swastyastu Angga Panureksa sane wangiang titiang Asapunika taler, semeton sareng sami sane tresnasihin titiang Kaping ajeng ngiring sareng sami ngaturang rasa angayubagia majeng ring Ida Sang Hyang Widhi Wasa, sangkaning pasuecan Ida titiang ngiring ida dane sareng sami prasida mesadu ajeng ring genah lan galah sane becik kadi mangkin puniki ring parikrama Wikithon Partisipasi Publik Bali Berorasi. Sadurung nglantur icenin titiang nyinahang angga wastan titiang Ni Komang Riska Dewi. Ring galahe mangkin, lugrayang titiang ngaturang pidarta utawi orasi sane mamurda Sampah Utawi Mis Sane Nyemerin Wewidangan Pariwisata Semeton sareng sami, Bali kepanggihin antuk keluwihan miwah keasrian jagatne sane prasida narik wisatawan mangda rauh ke Bali. Akeh genah wisata sane wenten ring Bali, nanging mangkin sampun akeh masih genah wisata sane kacemerin antuk sampah wiadin mis sawireh akeh sane ngutang sampah nenten ring genahnyane lan nenten eling teken palemahan. Yening parilaksana puniki keterusang pastika jagat Bali nenten asri malih, lan nika sane prasida ngranayang Bali nenten dados destinasi wisata sane katuju olih wisatawan mancanegara, lan olih parilaksana puniki nenten kelaksanayang tri hita karana sane wenten ring Bali. Pikobet puniki sane mewehin krama bali sawireh akeh krama sane state ngaptiang pikolihnyane saking pariwisata. Saking pikobet puniki, titiang ngaptiang majeng ring semeton sareng sami mangda nguratiang mis lan palemahan duene, titiang ngaptiang para pemimpin Bali sane pacang kapilih ring warsa 2024 mangda nguratiang indik mis utawi luwu sane wenten ring Bali. Pemimpin Bali keaptiang mangda prasida ngicenin solusi ring pikobet mis puniki lan prasida ngicen conto indik utsaha nyaga palemahan mangda prasida katulad olih krama Bali sane lianan. Inggih wantah asapunika sane prasida aturang titiang ring galah sane becik puniki. Dumogi napi sane aturang titiang prasida keresepang tur kelaksanayang. Peed prada yening wenten atur titiang sane nenten manut ring arse titiang nunas geng rena pengampura. Sineb titiang antuk paramasanti.. Om Santih, Santih, Santih Om
Enable comment auto-refresher