Pidan ring pajumunan kawentenan covid-19 ring gumi Baline, tiang taen gelem sesek. Tiang jejeh sajan dugase ento karna tiang megae ring sekolah PAUD. Tiang jejeh yen tiang kena covid, murid-muride lakar tertular. Pas gelem ento konden ada arahan uli pemerintah melajah jumah. Makelo-kelo covid ring Bali ngancan liu, murid-murid harusine melajah jumah. Pas libur jumah ento, tiang nu gelem, lemah peteng awak tiang kebus, magenepan sampun ajeng tiang cara yeh hanget, vitamin C, jak susu, nanging gelem tiang nika sing nyak hilang, lantas tiang ke dokter atehina teken bapak tiang. Di dokter liu sajan pasiene, liu anake gelem makekoan, pilek, jak kebus awakne. Pas giliran tiang macelep, doktere nakonang tiang gelem napi, tiang ngorahang gelem sesek, lantas doktere nyeh. Tiang baange pil teken doktere, lantas neked jumah tiang naar pil jek ada bin duang lemeng tiang nu tetep gelem. Taen tiang berpikir ukane rapid tes ke rumah sakit Sanglah tapi tiang nyeh lan sebet, nyeh yen tiang ke Sanglah malahang tiang tertular covid ditu. Lantas tiang memutuskan ngoyong jumah. Petengne setata tiang ngipi jelek, tiang nyeh lan kadang ngeling di kamar. Lantas ada bin aminggune lantas tiang seger, liang sajan keneh tiange. Makelo-kelo med tiang jumah karna tiang anak ane pemikir, mawinan karna aktivitas jumah lebih liu berpikir dibandingkan nyemak gae dadine tiang sai gelem, kadang tiang berusaha ngalih kegiatan anggon nyibukang raga cara milu melajah online, video call jak timpal utawi telponan jak timpal, marengan I Meme megarapan jumah, liu ane lianan buin. Sakewanten tetep lian karasayang tiang nenten cara setonden ada covid-19. Tiang mula harus melajah, melajah hidup baru, hidup new normal, karna covide sing kal ilang uli gumine niki. Tiang lakar melajah nyalanang hidup ring era new normal niki, nyumunin uli meblanja ke peken, megae ke sekolah anggo nyiapang tahun ajaran baru, ngatehang I Meme mulih ke jumah bajangne, liu malih sane lianan. Makejang mula patut melajah hidup new normal, karna perubahan niki ne paling kekal ring gumi, makejang anake harus berubah, sing ada ane kekal ring gumi niki, roda ento maputar, jalani gen hidup lan inget setata tekening Ida Sang Hyang Widhi Wasa. Dumogi Ida ngicenin waranugraha lan merta. Bin besik da kanti engsap mebakti, karna raga tusing nawang apa ane lakar wenten ring gumi. Setata bagia nyalanang hidup ring gumine. Astungkara makasami rahayu.
Enable comment auto-refresher