Om Swastyastu. Suksmaning manah aturang titiang majeng ring pangeter acara duaning sampung mapaica galah ring sikian titiang. Angga tim juri sane kaping singgih, ida dane para penodia sane dahat wangiang titiang, asapunika taler para semeton pamiarsa sane tresna asihin titiang.
Sadurung titiang ngelanturang matur, lugrayang titiang ngaturang rasa angayubagia majeng ring Ida Sang Hyang Widhi Wasa riantukan sangkaning sih pasuecan ida, mawinan titiang prasida ngiring ida dane mapupul iriki sajeroning acara Wikithon Partisipasi Publik Bali Berorasi. Ida dane sareng sami sane dahat wangiang titiang, ring galahe sane becik sekadi mangkin puniki, lugrayang titiang jagi ngaturang orasi sane mamurda Ngelestariang Basa, Aksara, Lan Sastra Bali Malarapan Antuk Optimalisasi Tripusat Pendidikan .
Inggih, ida dane sareng sami, panglimbak globalisasi madue pengaruh sane ageng ring budaya daerah utamanyane budaya bali. Ring aab modern sekadi mangkin puniki, budaya bali sekadi basa, aksara, lan sastra bali sayan katinggalin olih generasi muda. Conto sane pinih becik inggih punika basa inggris sane sampun ngranjing ring kauripan iraga soang-soang. Punika dados tantangan sane urgen pisan majeng ring para pemimpin bali sane pacang kapilih ring warsa 2024.
Pemimpin Bali kaaptiang mangda prasida nincapang Tripusat Pendidikan, minakadi ring kulawarga, ring sekolah, miwah ring masyarakat mangda prasida ngalestariang budaya baline. Tripusat pendidikan punika patut saling nyangkeping riantukan sane sampun kauningin, lingkungan formal setata kautsahayang nanging iraga sekadi lali antuk lingkungan kulawarga.
Pinih ipun lingkungan kulawarga punika genah sane utama antuk generasi muda melajahin budaya bali. Raris kabudayaan sane kaplajahin saking irika pacang kakukuhang olih lingkungan sekolah sane pinaka genah kaping kalih antuk generasi muda masikian miwah magubugan. Lingkungan masyarakat taler mabuat pisan majeng ring para generasi muda mangda ngawigunayang napi sane sampun kaplajahin.
Antuk punika, titiang ngaptiang mangda calon pemimpin Bali ring warsa 2024 prasida antuk mengoptimalkan tripusat pendidikan punika. Pemimpin Bali patut prasida ngicenin solusi mangda nenten wantah ring lingkungan formal iraga prasida polih pendidikan budaya, nanging taler ring lingkungan kulawarga.
Inggih, ida dane sareng sami, asapunika orasi sane prasida aturang titiang. Dumogi napi sane aturang titiang prasida karesapang saha dados kautamayang olih calon pemimpin Bali ring warsa 2024. Manawita wenten maka kirang-kirang ipun, titiang ten lali nglungsur agung rena pengampura. Maka wusananing atur, puputang titiang antuk paramasanthi. Om Santhi Santhi Santhi Om
Enable comment auto-refresher