Kedis Sangsiah lan I Lutung
Summary
In English
In Balinese
Di alas Jenggalasila, punyan-punyanan kayune mentik mokoh tur bet. Punyan kayu ane ngrembun dadi umah kedis masebun, mataluh, lan mamanakan. Kedis Cetrung ngae sebun di punyan kayu ane endep tur ngrembun. Sebunne cenik. Kedis Sikep ngae umah di punyan kayune tegeh. Sebune gede turin siteng. Kedis Sangsiah ane bungkulanne cenik ngae sebun gede turin lantang. Sebunne magantung di punyan nyuhe. Song sebunne cupit, nanging di tengahne ada gook lantang turin linggah. Makejang angob ningalin sebun Kedis Sangsiah ane dengel. Liu masih kedis-kedise iri tur masesimbing kerana kedis Sangsiah setata nyumbungang umahne melah. Rikala katempuh angin, sebun Sangsiah ane gede turin lantang glayut-glayut cara pragina sedeng ngigel. Kedis-kedis di alas Jenggalasila marasa kalah yen masaing ngae sebun melah. Kedis-kedise grimutan ningehang gendingan I Kedis Sangsiah ane setata ngwalek. Kedis Cetrung, a paling sawai ngurut tangkah ningehang walekane I Kedis Sangsiah. Nanging I Kedis Cetrung tusing taen ngenahang pedihne. Ia setata mautsaha pakedek pakenyung ngajak pisaga. Rikala macepuk, I Kedis Cetrung setata ngajumang I Kedis Sangsiah, nyambatang sebun Sangsiah paling melah lan dengel. Kedis Sangsiah ane demen kaajumang nyumangkinang makeber negehang. Mageding di malun sebun I Kedis Punglor, Kedis Celepuk, muang kedis lenan. Melah sajan sebun caine, dot sajan icang nginep ditu pang taen gen pules di tongos anget, keto pasaut kedis-kedise mapi-mapi demen ningehang gendinganne I Kedis Sangsiah ane ngwalek. Sedek dina anu, rikala Kedis Sangsiah lua mataluh, kedis Sangsiah muani makeber joh ngalih mamahan. Ia maenceg di punyan kayune liglir. Ia ningalin I Lutung ngegehang. I Kedis Sangsiah lantas ngemaikin I Lutung. He Lutung, da pedih nah, tusing ada keneh icange jele tekening cai. Icang medalem ningalin anak buka cai ngegehan ulian tusing ngelah umah. To tingalin sebun icange magantung di punyan nyuhe, melah turin dengel. Cai sepatutne nyidang ngae umah luihan tekening sebun icange I Lutung mabading tundun, tusing ngrunguang patekane I Kedis Sangsiah. Gedeg sajan ia ningeh munyine I Kedis Sangsiah kerana sabilang macepuk setata nyumbungang sebunne ane melah turin dengel. Sujatine cai ngelah kabisan turin andel, yadiastun cai tusing bisa ngae umah melah turin dengel cara icange, paling sing cai bisa ngae umah gede turin siteng saihang tekening sebunne I Kedis Sikep. Gaenang iban caine umah, kanggoang ambengan anggon rabne. Yen cai idup tan paumah, makelo-kelo cai gelem ngemasin mati Icang demen pules di tongose galang. Dong tingalin, icang seger oger buka kene, icang tusing nyaratang umah cara caine Da keto, pasti cai lakar sakit. Masan aine nyentak cai kepanesan. Masan sasih Karo buka janine, cai ngegehang. Tempa icang, sebun icange melah turin dengel, icang anget pules masan ujan, keto masih tusing kebus masan aine nyentak. Da kalu, yen buka kene idup caine tan paumah, makelo-kelo cai ngemasin mati ulian sakit kebus dingin. Gaenang iban caine umah yadiastun cai tusing bisa nempa sebun icange ane melah I Lutung nengil, matane barak ulian pedihne kaliwat. Dot ia nakep kedis sumbung di arepne, nanging I Kedis Sangsiah suba makeber ngejoh. Buin kejepne, teka tur maenceg di carang kayune liglir. He Lutung, jegangahang iban caine, buktiang yening cai ngelah pangajin raga. Cai patpat ngelah batis, ikut caine lantang, gigi lan kukun caine mangan, nanging lacur tusing bisa ngae umah I Lutung mautsaha nanggehang pedih basangne. Matane nengeng nolih I Kedis Sangsiah. He cai Kedis Sangsiah, cai tusing nawang lelintihan leluhur icange ngae kreteg rikala Sang Rama Dewa perang tanding nglawan Sang Rahwana. Leluhur icange ngaenang Sang Rama Dewa kreteg apang nyidang megat pasih lan teked di Puri Alengka. To ulian kabisan watek wanarane apang cai nawang Kedis Sangsiah kagiat. Ia tusing madaya yening I Lutung nyambatang lelintihan leluhurne pidan. Nanging I Kedis Sangsiah tusing nyak jerih. Ia mautsaha ngwalek tur ngmanes-manesin I Lutung apang nyak ngae umah sekadi wangsa kedis ane ngelah sebun di alase. Hehehehe, lucu. Cai sumanggup ngaenang anak len kreteg, nanging tusing bisa ngae umah anggon padidi. Nirguna, pocol cai ngelah kabisan yen sing adokang anggon dewek padidi I Lutung tusing nyidang nanggehang basangne gedeg. Ia makecos tur mautsaha nakep I kedis Sangsiah. Nanging I kedis Sangsiah becat makeber nylametang raga. I Kedis Sangsiah lantas nyambatang teken somahne tur ngajakin magedi sawireh I Lutung pedih tur ngepungin. I Lutung ngecosin punyan-punyanan kayune ngepungin I Kedis Sangsiah. I Lutung lantas ngojar punyan nyuh tongos I Kedis Sangsiah masebun. Ia nyeluk song sebune tur nyetset umahne I Kedis Sangsiah. Sebun Sangsiah ane dengel benyah latig ulian I Lutung kaliwat pedih.
In Indonesian
Enable comment auto-refresher