Om Swastyastu, Salam Sukses Tetap Berprogress, Sane rumaga angga panureksa sane dahat kusumayang titiang. Para pamilet sami sane wangiang titiang, Punika taler para atiti sareng sami sane tresna asihin titiang.
Sadurung titiang ngawitin matur amatra, ngiring sareng sami nyakupang kara kalih nyihnayang rasa angayubagia majeng ring Ida Sang Hyang Widhi Wasa, duaning sangkaning pasuecan asung kerta wara nugraha Ida, titiang pingkalih ida dane prasida mapupul ring acara sane becik puniki inggih punika Wikithon Partisipasi Publik Bali Berorasi .
Para semeton sareng sami pastika sampun uning gumi Baline punika kabaos daerah tatujon wisata Indonesia sane sampun kasub ring jagate. Bali ngamanggehang Pariwisata Budaya pinaka daya tarik wisatawane sane pinih utama, nika ngawinang akeh wisatawan mancan negara utawi lokal malancaran ka Bali. Nanging iraga taler patut eling, Gumi Baline punika tanah sane suci, wenten awig-awig, pakem, lan desa kala patra sane patut kalaksanayang utawi kaupapira kalestariang mangda gumi Baline prasida ajeg, kukuh, miwah lestari. Aturan punika nenten kalaksanayang olih krama Bali kemanten nanging samian pihak ring sektor pariwisata miwah krama sane meneng ring Bali taler wisatawan domestik miwah wisatawan duranegara. Nenten je wawu dados wisatawan menyalahi aturan sane wenten, napi malih maparilaksana kasar utawi semena - mena. Yening kawentenan wisatawan sekadi puniki pastika sampun ngwetuang pikolih sane nenten becik ring kahuripan jagat Baline.
Ring kawentenan sektor pariwisata jagat Bali sekadi mangkin wawu ngawit pulih saking dampak Covid 19, akeh parilaksana wisatawan saking duranegara nenten anut ring aturan sane wenten ring Bali. Contohnyane kasus wisatawan sane ngusak asik Pura Goa Raja, Besakih. Wisatawan saking Korea Selatan punika ngrusak sarana sane wenten ring pura, minakadi tedung, sangku, kendi, kotak punia, wastra pelinggih. Punika sane ngawinang area pura leteh utawi tercemar. Lantas pengempon ring Pura Goa Raja ngelaksanayang upacara prayascita alit anggen nyuciang malih sawewengkon purane. Parisolah wisatawan punika ngawinang kerugian sane ageng lan akeh majeng ring krama lan banjar adat. Indike puniki pastika sampun ngletehin pakem lan adat Bali. Nenten wantah punika, kari akeh imba sane lianan, inggih punika wisatawan sane nenten mabusana ngingel ring pentas tari pendet Puri Saraswati lan Pura Gunung Batur, wisatawan sane mafoto nenten nganggen busana ring taru kayu putih suci ring kabupaten Tabanan, wisatawan sane melinggih ring pelinggih Pura Teratai Bang, wisatawan sane meditasi nenten nganggen busana ring Denpasar. Tiosan ring pura, wenten wisatawan sane nenten nganggen busana ring genah umum, contohnyane ring Kuta Kelod.
Saking pikobet ring ajeng,sujatinyane pemerintah Bali sampun makarya surat edaran Gubernur Bali Nomor 04 Tahun 2023 indik tatanan baru majeng ring wisatawan mancanegara sane singgah ring Bali. Penetapan peraturan indik parilaksana wisatawan, sampun nganutin norma norma kebudayaan Bali, nanging durung prasida kemargiang becik pisan, kantun wenten wisatawan sane maparilaksana nenten nganutin adat istiadat ring Bali lan ngusak pakem sane sampun kadruwenang olih jagat Bali. Nika mawinan titiang mapangapti ring pemimpin sane kapilih ring warsa 2024 mangdane bersikap tegas manut aturan sane sampun kamedalang, yakti - yakti sutindih nyaga jagat Baline saking iusan globalisasi sane nenten becik lan parajana sami utamanipun generasi Bali nenten keni iusan sane nenten becik.
Ngiring semeton sami sareng jaga gumi Baline, urati ring kawentenan para wisatawan sane rauh ke Bali. Mangdane adat lan budaya Baline pinaka tetamian leluhur saking nguni nenten kacampahang. Inggih wantah asapunika prasida aturang titiang, kirang langkung titiang nunas ampura. Puputang titiang antuk parama santi. Om Santih, Santih, Santih Om.
Enable comment auto-refresher
Pandegedeanta
Permalink |