Lugrayang titiang ngaturang panganjali umat, om swastyastu.
Kaping ajeng suksma aturang titiang majeng ring ugrawakya antuk galah sane sampun katiba ring pasikian titiang. Para angga panureksa sane wangiang titiang Tim BASAbali Wiki sane kusumayang titiang Para sameton sareng sami sane tresna sihin titiang Bagia pisan manah titiang rahinane mangkin, duaning sangkaning pasuecan lan asung kertha wara nugraha lda Hyang Widhi Wasa, titiang kaicen galah ngaturang sarin-sarin manah titiange ring lomba Wikithon puniki. Suksma aturang titiang majeng para angga panureksa miwah tim BASAbali Wiki sane sampun ngwacen tulisan titiang.
Ring galah sane becik puniki, lugrayang titiang ngaturang pikobet sane patut kauratiang olih calon pemimpin bali, inggih punika pikobet alih fungsi lahan carik ring Bali. Pulo Bali inggih punika pulo sane medue jadma akeh miwah ngancan nincap sabilang warsanyane. Punika sane ngeranayang wewangunan ring Bali nincap nganutin galah. Manut ring data Balai Pengkajian Teknologi Pertanian wenten 1.568 hektar carik sane makirang ulian kealih fungsiang dados umah, hotel, miwah wangunan sane lianan. Yening liu jadma sane ngewangun wangunan nganggen lahan carik. Ring dija iraga sami nanem entik - entikan? Ring dija krama Bali ngerereh pangan sane jakti mudah tur becik?. Napi malih Bali medue adat utawi budaya mewasta seke subak sane wantah warisan dunia kapagehang olih UNESCO. Saking pikobet puniki, titiang ngaptiang para pemimpin bali sane pacang kapilih ring warsa 2024 mangda nguratiang indik pikobet alih fungsi lahan carik ring Bali mangda prasida puput. Wenten tigang paindikan sane prasida aturang titiang majeng ring calon pemimpin, sajeroning pikobet puniki. sane kapertama pemimpin Bali kaaptiang mangda ngicen plang-plang utawi tanda peringatan mangda nenten ngewangunin wangunan ring area carik punika. Kaping kalih aptiang titiang mangda pemerintah ngicenin sosialisasi ring desa - desa sane kari medue carik mangda nganutin undang - undang napi sane sampun wenten indik perlindungan lahan carik. Sane kaping untat inggih punika aptiang titiang malih mangda pemerintah ngicenin anggaran utawi wantuan marupa jinah miwah sane lianan ring para pamacul petani . Usulan puniki patut uratiang krana pacang nincapang produksi beras, nglimbakang lapangan kerja, miwah nglestariang sumber daya alam SDA .
Asapunika sane prasida aturang titiang ring galahe mangkin. Mugi-mugi napi sane aturang titiang puniki prasida dados uratian tur dasar program kerja sane pacang kautamayang olih calon pamimpin sane jagi kapilih ring 2024.
Puputang titiang antuk parama santih om santih santih santih om.
Enable comment auto-refresher