Hp-ne Dueg, Iraga Kena Belog-belog

Photo credit

Issue name

Year

Contributor

Ni Luh Putu Lia Kartika

Author(s)

Enable comment auto-refresher

Adisastra

45 months ago

Votes 0

Becik pisan... ngiring dueg2 nganggen hp dueg 😁

Permalink | Reply

Dian Adryati

45 months ago

Votes 0

Teknologi di tangan yg salah itu berbahaya ya. Semoga kita bs lebih bijak memanfaatkan teknologi, untuk membantu memudahkan hidup, khususnya smart phone bukan malah buat masalah 😊

Permalink | Reply

Yunibali

45 months ago

Votes 0

nggih musti pilah2 informasi ring sosmed

Permalink | Reply

Description

English

⏤

Balinese

Hp-Ne Dueg, Iraga Kena Belog-Belog

Perkembangan teknologi informasine saja madan enggal. Jaman jani, liu pesan alat-alat canggih di gumine. Contohne smartphone wiadin ponsel pintar. Kadi rasa makejang anake ngelah handphone hp ane dueg nenenan. Dot nelpun, nganggo hp. Dot mabalih, nganggo hp. Dot mamaca berita, masi nganggo hp. Keto masi nutur sambil ngisi hp, madaar ngisi hp, kanti masare masi kadampingin hp. Ulian ento, bisa awainan ngurik hp. Tur murid-muride di masan gring agung Covid-19, malajah daring masi nganggo hp. Tatujon nganggo hp mulane tuah ane melah-melah. Sakadi hp-ne ento, apang manusane masi ngangsan dueg. Liu pesan paplajahan ane ngidang kaplajahin. Informasi ane marupa tulisan, gambar, miwah video jug mabrarakan. Mapan canggih, informasine masi enggal pesan kasebar. Tusing care ipidan, beritane di Jakarta ngapuanang kanti aminggu mare neked di Bali. Ane jani, beritane di luar negeri bisa langsung tawang ulian di internet.

Nah, ane patut kawaspadain tuah informasi ane mogbog utawi hoaks. Yaning tusing pedas, bisa kena uluk-uluk. Informasi hoaks nenenan biasane masebar di media sosial. Bisa di SMS, whatsapp, facebook, youtube, tur ane lenan. Ane tusing saja, bisa cara saja. Ane saja, bisa cara bogbog. Informasine ane cenik bisa ngedenang. Sasenggake, ulede bisa dadi naga. Mulane tutur abesik, makelo-kelo bisa dadi telu.

Informasi hoaks tusing buwungan bisa ngae wargane jejeh lan takut. Ada masi ane ngaranang mauyutan ulian isine marupa adu domba . Iraga dadi anak luh, patut masi bareng nulak informasi hoaks. Hari Perempuan Sedunia, 8 Maret 2021 ane suba liwat jalan anggon momentum. Sawireh, luh-luh cara janine tusing kalah teken anak muani nganggo teknologi. Ento mawinan, iraga masi perlu waspada teken informasi ane soleh-soleh. Eda pesan iraga enggal ngugu. Apa buin milu nyebarang. Contohne pesan singkat berantai. Biasane misi ajakan apang milu nyebar. Ada masi ane ngaba-ngaba pasengan Ida Bhatara. Yaning tusing milu nyebar, kone lakar kena pastu. Ento mawinan iraga perlu pasajan mamilah lan mamilih informasi ane beneh.

Yaning baca di https: m.merdeka.com trending hoax-adalah-berita-bohong-kenali-ciri-ciri-jenis-dan -cara-mengatasinya-kln.html?page 3 ada ciri-ciri berita hoaks totonan. 1. Nganggo email wiadin media sosial apang enggal kasebar. 2. Isine tuah pesan, informasi utawi berita ane makada pembaca jejeh. 3. Misi himbauan apang pembaca milu nyebar. Dadine, informasi hoaks totonan ngangsan enggal kasebar di masyarakat. 4. Tusing ada identitas pengirim informasine.

Nah, cara ane aluh ngabinayang berita hoaks lan asli masi ada. 1. Iraga patut nalektekang judul informasine. Berita hoaks biasane nganggo judul sensasional tur provokatif. 2. Iwasin alamat situsne. Berita hoaks biasane tusing uli situs resmi utawi uli domain blog ane kasengsaya keaslianne. 3. Cek fakta beritane ento, bandingang teken sumber uli institusi resmi cara kepolisian, KPK, tur ane lenan. Patut masi waspada yaning beritane ento mulane uli tokoh politik, penggiat politik lan pengamat politik. 4. Cek keaslian fotone. Jaman jani ngubah foto lan video aluh pesan. 5. Iraga patut aktif nyarengin grup-grup diskusi penanggulangan berita hoaks.

Lenan teken ento, ada masi jenis-jenis berita hoaks ane patut kawaspadain. 1. Hoaks virus di tengah komputer utawi hp pintar irage. 2. Hoaks kirim pesan berantai. 3. Hoaks urban legend ane ngarahang pembaca apang tusing malali, matumbasan lan nyalanang kegiatan ane mistis. 4. Hoaks maan hadiah gratis. 5. Hoaks pencemaran nama. 6. Hoaks cerita anak idup tuara. Biasane misi nomor rekening tur ngajak pembaca mapunia, nanging sujatine pipisne tusing sumbanganga.

Eda bingung. Berita ane hoaks ento bisa kalaporang, carane : 1. Yaning media sosial facebook, dadi nganggo fitur Report Status lan kategoriang informasi hoaks marupa hatespeech harrasment rude threatening lan kategori lenan ane cocok. 2. Di Google, dadi nganggo fitur feedback ngalaporang situs uli hasil pencarian yaning misi kabar palsu. 3. Twitter ngelah fitur Report Tweet anggo ngalaporang twit ane tusing patut, keto masi di instagram. 4. Pengguna internet masi dadi ngalaporang konten negatif utawi hoaks ke Kementerian Komunikasi dan Informatika nganggo e-mail, kirim ke aduankonten mail.kominfo.go.id.