Jero Ketut
Summary
In English
In Balinese
Prabu Suliawana nitahang panjak idane ngejuk kedis Geruda ane ngrebeda. Kedise ento gede sajan. Ngamah panak kambing, kucit, siap, muang ubuh-ubuhan kramane. Ento ngranayang kramane sedih kerana ubuh-ubuhan ipune sawaian ilang sander Geruda. Juru borose ada numbak, nulup, manah, keto masih mautsaha nyaet nganggon tali. Nanging mamocol, I Geruda setata nyidang makelid tur makeber nambung nylametang raga. Prabu Suliawana nitahang patih idane nglaksanayang sayemwara. Nyen ja nyidang ngejuk kedis Gerudane, idup utawi mati, kapica linggih di puri. Gusti Patih lantas nunden juru carik nyobiahang sayemwarane tekening krama di sajebag Puri Kertha Bumi. Nanging kramane tusing ada ane bani ngmilunin sayemwarane ento. Da ja nyambatang milu, pesu uling pondokne tusing bani. Makejang jejeh ngemasin mati sander Geruda. Bikul ane nedeng pules di song carike ningeh juru carik purine nyobiahang sayemwarane ento. Ia gegirik ngmilunin sayemwarane ngejuk Kedis Geruda. Tusing ada pelihne nyobak, mumpung ada kesempatan jeg milunin gen. Ane cerik tonden pasti jerih, dayane adokang keto I Bikul ngedenang bayune. Ia mineh-minehin I Geruda tusing sandang jejehin. Apabuin I Geruda sawai ngidih tulung tekening bikul. Dikenkene ngidih tulung ngalihin kutu muang ngedasin nyanyad di bulune. Kul, kenken kabare? I Geruda maenceg di pundukane tur nakonin I Bikul. I Bikul ane mara pesu uling songne lantas maekin I Geruda. Benengan janine makejang ajak seger rahayu. Kewala jani icang kapah pesu kerana ada imbauan pemerintah nyodog jumah, stay at home apang tusing kena virus corona, saut I Bikul. I Geruda lantas nyambatang tatujone teka. Ia ngidih tulung apang I Bikul ngalihin kutu di bulune. Ia nyambatang awakne genit kaukud. Tulungin ja icang Kul, kedasin kutu-kutu ane ngrayang di awak icange keto I Geruda nyambatang pangidihne. Yes, ene madan kesempatan melah I Bikul kendel di kenehne. Ia mapi-mapi patuh ngisinin pangidihne I Geruda. Ia nunden I Geruda ngebatang kampidne ane lumbang. I Bikul tangkejut ningalin kutu pasliur di kampidne Geruda. Ia minehang tusing nyidang ngedasang kutune padidian. I Bikul lantas ngelurin timpal-timpalne apang nulungin. Tusing makelone panyatusan bikul suba teka, mapunduh tur nglinderin I Geruda. Bikule ada menek ka tundune, mentangang kampidne, ada masih macelep ka kupingne. Becat sajan bikule ngejuk tur ngmatiang kutu-kutune. I Geruda marasa liang tur demen ngelah timpal buka I Bikul ane setata mapitulung. Apabuin I Bikul magae anteng maimbuh ngupinin ane makada I Geruda nguyukang. Ia lantas pules ngengkis. I Bikul saling tolih. Lantas ada ane ngemaang titah. Ipun tusing buin ngejuk lan ngamatiang kutune nanging mutbutin bulune I Geruda. Becat sajan para bikule mutbutin bulun Gerudane. Rikala bulun Gerudane meken telah, sinalih tunggil Bikule tangkil ka Prabu Suliawana. Mamitang lugra Gusti Prabu, Kedis Geruda sane dados meseh Gusti Prabu lan panjak-panjak Puri Kertha Bumi sampun kalahang titiang. Mangkin ipun tusing nyidang makeber, atur I Bikul ring Sang Prabu Suliawana. Ningeh munyine I Bikul buka keto, Prabu Suliawana nenten ngugu. Gusti Prabu kasarengin pepatih lan panjak-panjak idane raris lunga ka carik jagi muktiang pasadokne I Bikul. Ida Sang Prabu kagiat santukan nyuryanin I Geruda liglig tan pabulu. I Geruda tangkejut tur mautsaha makeber, nanging ia tuah nyidang kecag kecog di pundukan carike. Panjak Puri Kertha Bumine lantas ngepungin tur ngejuk I Geruda liglig. Panjak-panjak Puri Kertha Bumi masuryak girang kerana nyidang ngejuk I Geruda ane ngrusuhin. Gusti Prabu lan panjak-panjak idane maekin I Bikul tur ngaturang parama suksma. Sakadi panumaya, Gusti Prabu micayang linggih tekening I Bikul ane ngmenangin sayemwara ngalahang Geruda. Nanging I Bikul nulak kapica linggih apabuin kapica mirah muang jinah. Gusti Prabu raris ngicen gelar Jero Ketut kapining I Bikul.
Enable comment auto-refresher