Summary
In English
In Balinese
Telaga ento asri pesan. Yehne ening. Bunga tunjung warna warni tumbuh di tengah telagane. Angsa saling kepungin macanda girang. Dikenkene malomba makeber ngiterin sisin telagane lantas maenceg di punyan kayune. Angsa tua mapangenan di sisin telagane. Ia ningalin cucun-cucunne maplalianan saling simbuhin. Nadaksara ia tangkejut sawireh ada ane nakonin. Rahajeng semeng, Angsa Tua Dadike tiang nimpalin? Rahajeng semeng, Celepuk, saut Angsa Tua. I Celepuk sawai singgah ka telagane ento. Umahne joh uling telagane. Sing ada telaga melah di jagate, sajaba dini icang ningalin telaga rawit buka kene. Dadike icang nginep dini? Angsa Tua girang ningehang pangidih I Celepuk. Ia marasa tusing padidiana, ada lakar ajak mapangenan di sisin telagane. Ipun seleg nuturang idupne ane lawas. I Celepuk bangga nuturang tongosne mamondok. Nongos di alas bet di bongkol gununge. Uling tongosne ento, beburon ane idup ditu nyidang ningalin sakamata ane dumilah. Sakewala tusing makelo Angsa Tua ajak I Celepuk maan nutur. I Celepuk mulih nelokin kulawargane. Yen ada galah, singgah ka pondok icange nah keto pangidih I Celepuk tekening I Angsa Tua. Angsa Tua buin padidiana mapangenan di sisin telagane. Ia inget teken pajalan idupne pidan. Jani suba tua, sinah enggal ngalahin pianak cucu ka tanah wayah. Ia inget ajak I Celepuk, dot nuturang idupne lawas. Prajani ia ngelah keneh mlalinin I Celepuk. Cucu pekak ajak makejang. Satonden pekak mati, pekak dot ningalin tongosne I Celepuk ane dumilah di bongkol gununge, keto Angsa Tua masadok teken cucu-cucune. Disubane pianak cucune cumpu, Angsa Tua makeber ngalih tongosne I Celepuk nongos. Makelo ia ngalih-ngalihin umah timpalne. Punyan-punyanan kayu gede turin bet mentik di bongkol gununge. Disubane matakon-takon, ia neked di tongosne I Celepuk. Celepuk, dija cai? Icang Angsa timpal caine teka mlalinin keto Angsa Tua kuuk-kuuk. Icang dini di guok kayune. Yen suba matan aine engseb, cai dadi macelep. Icang sing nepukin apa tengaine. Angsa Tua ane kenyel lantas mareren di bongkol punyan kayune gede. Ia ngantosang matan aine engseb. Ia kadaut ningalin sakamata ane dumilah uling guokne I Celepuk. Nadaksara uling bet-bete nengok juru boros natad sanjata. Ningalin angsa malengok di bongkol kayune, I Juru Boros ngenggalang ngedeng katik bedilne. Dor Angsa Tua mati. Makelo sajan I Celepuk ngantosang sapetakan Angsa Tua. Ia ngalahin sebune, makeber milehan ngalihin Angsa Tua nanging tusing tepukina. Keto masih pianak lan cucune ane nongos di telagane angen tekening pekakne. Nanging Angsa Tua tusing mulih. Makelo-kelo ada orta pekakne mati kena tembak. Makejang ngeling, Tusing nyidang narka patekan matine
In Indonesian
Enable comment auto-refresher