Summary
In English
In Balinese
Dugas pidan ring gumi Daha, ada anak cerik madan I Lacur. Ia kaliwat lacur, nanging jemet magae tur demen nulungin timpal. Yen ada anak ngorin magae, ia tusing taen nulak. Liu anake olas lan sayang teken ia. Buina ia duweg pesan, yen orin a cepok langsung bisa. Ento masih mawinan liu timpal-timpalne demen ngajakin ia mlali sawai-wai. Sedek dina anu, ada layangan mamegat tur engsut di punyan kayune. I Lacur ajaka timpal-timpalne nguber layangane ento. Ditu I Klaleng timpal I Lacure ane taen mlegendahang I Lacur menek ka punyan kayune ngalih layangan. Tonden teked baduur, I Klaleng ulung. Ngaduh-ngaduh I Klaleng ngorang sakit. Mirib elung batisne. Ditu lantas I Lacur ngandong I Klaleng mulih ka umahne. Diapin ja I Klaleng taen mlegendahang dewekne, I Lacur nyak masih nulungin I Klaleng. Ditu lantas I Klaleng nyuksemaang pesan parisolahne I Lacur. Buin manine I Lacur ka alase ngalih don-donan lakar anggona jukut. Joh pesan ia nyeluksuk alase ngalih don-donan. Sing karasa suba makelo ia di tengah alase. Saget ia nepukin pondok melah pesan, pondoke ento kalintang asri. Meled kenehne I Lacur singgah ka pondoke ento. Mara ia tau ane nongos di pondoke ento Ki Dukuh Sakti. Kawastanin Ki Dukuh Sakti santuka dane wikan pesan ngubadin anak sakit tur masih duweg masastra. Ditu lantas I Lacur ajaka nongos di pondoke tur kaajahin maubad-ubadan tur masastra. Makelo-kelo I Lacur nau pesan mondok di pondokne Ki Dukuh Sakti. Mula sangkaning panumaya I Lacur enggal dadi midep nunas ajah teken I Kaki Dukuh. Ia enggal nerima palajahan ane kaajahin olih Ki Dukuh. Ento ulian I Lacur nak mula jemet tur rajin malajah. Tusing taen ia nungkas apa ne kaajahin olih I Kaki Dukuh. Ento mawinan I Lacur enggal bisa ngubadin tur duweg masastra. Disubane makelo mondok, saget ada orta Ida Raden Galuh Daha sungkan banget ring puri. Ditu lantas Dane Jero Dukuh mapica tamba tur ngandika apanga I Lacur ngaturang tambane ka puri tur nambanin Ida Raden Galuh. Majalan I Lacur ka Puri Daha. Gelisang cerita, sangkaning titah Hyang Widhi, dadi gelis Ida Raden Galuh kenak kadi jati mula. Makejang wong purine ledang pisan. Pamuputne I Lacur kaicen paica marupa tanah carik, tegal muah umah pakarangan tur kaadegang dadi Manca Agung ring Puri Daha. Sasukat ento I Lacur kagentosin adan madan I Subagia. Keto suba upah anake jemet tur rajin malajah. Sinah pungkuran bakal nemu bagia.
In Indonesian
Enable comment auto-refresher