I Gringsing Teken Ni Ranjani
Summary
In English
In Balinese
Kacerita ane malu ada anak ngubu di tegale linggah ajaka dadua. Ia maadan Ni Ranjani teken memene. Ia tusing nu ngelah bapa, tur tusing ngelah nyama lenan. Geginane sesai sai tuah metanduran di tegale. Ritatkala semeng dina purnama, kacerita kone memen Ni Ranjani nyakitang basing. Ni Ranjani orahina ngalih dadong balian di duwur bukite kangin apang teka mai ngubadin. Umah dadong balian maraab ambengan. Gelisang satua, ngenggalang Ranjani luas ka umah dadong balian. Nganteg di umahe ento dapetanga suwung gamblang. Gelar gelur ia majeritan, tusing ada anak masaut. Disubane keto, majalan buin Ni Ranjani nuju umah ane buin besikan ane maraab duk. Ni Ranjani majeritan ditu. Lantas ada anak masaut uling tengah umahe. Demen atine Ni Ranjani sawireh katemu ngajak dadong balian. Tusing ada buin akejepan, pesu anak tua maawak gede, bok magambahan gempel, paningalanne nelik, munyine gede gara, nyonyone lambih, basang gede, batis mabulu, tur kuku lantang. Makesiab Ni Ranjani. Masaut anake aeng totonan. Yeah, nyai Ni Ranjani, kenken tumben nyai teka ka pondok dadonge. Masaut Ni Ranjani, Tulungin icang dong, memen icange nyakitang basang. Tiang tundene ngalih dadong apang ngubadin memen icange. Dadong basang gede nyautin, Nah lamun keto nyanan dadong kema ngubadin memen nyaine. Satonden nyai mulih alihang malu iban nyaine tebu. Tebune totonan daar tur ampasne sepahang di jalan. Nyanan ampas tebune totonan lakar tuwut dadong apang neked jumah nyaine. Kacerita suba Ni Ranjani nuwutin pamunyin dadong totonan. Jani ia suba neked di kubune sambilanga makpak tebu. Memene lantas nakonin. Tepuk dadong balian, Luh? Tepuk me, ne icang ngidih tebu orahina makpak tur ampasne lakar tuwuta tekening dadong balian apang nganteg mai. Makesiab memene ningehang pasaut pianakne. Dadong balian tusing ngelah tebu. Umah ane ken ojog nyai Paling malu cang ngojog umah maraab ambengan, kewala suwung mangmung. Lantas icang ka umah maraab duk. Dadong balian ane aeng ada ditu. Ningeh pasaut pianakne buka keto ngancan ngetor bayune Men Ranjani. Ih nyai Ranjani, tusing ja dadong balian ane ojog nyai, to raksasa ane demen nadah jlema. Ni Ranjani kesiab tur jejeh ningehang pasaut memene. Makejang paling ngenehang winaya apang selamet. Yen sing mengkeb sinah tadaha ajak dadong raksasa. Nah kene ben madaya, nyai menek ka punyan nyuhe di samping sembere, ditu mengkeb apang tusing tepuka teken Dadong Raksasa. Meme lakar mengkeb di beten palunganne apang tusing tepukina teken Dadong Raksasa. Disubane nyaluk sanja, Dadong Raksasa teka ka umahne Ni Ranjani nuwut sepahan ampas tebune tuni. Pajalanne keteb-keteb, nyonyone kaplik-kaplik, tur gigine kretek-kretek. Teked di pondokne Ni Ranjani, dapetanga suwung mangmung. Dadong Raksasa mageluran kewala tusing ada ane masaut. Ni Ranjani nepukin Dadong Raksasa uli duwur punyan nyuhe. Bayune ngetor. Keto masih memene ningeh gelurane Dadong Raksasa, kewala ia tusing nepukin sawireh ia matekep palungan. Makelo tusing ada anak nyautin munyine, Dadong Raksasa lantas negak duwur plangkane sambilang mangantosang. Ditu Dadong Raksasa nyiksik kutu. Suba makelo ngalih kutu, saget ada kutune leketik tur macelep ka beten palunganne. Dadong Raksasa ngalih tur badinganga palunganne. Dapetanga memen Ni Ranjani mengkeb ditu. Yeaaik, dong dini nyai mengkeb. Sing buwungan nyai mati. Lakar pakpak tulangne, ambis isine, tur ceret getihne, hahahahaha, keto munyine Dadong Raksasa. Men Ranjani mautsaha malaib nylametang raga, kewala lacur gancang Dadong Raksasa nyangkuak lantas katadah. Liang buka otonan kenehne Dadong Raksasa. Jani ia lakar ngalihin Ni Ranjani. Yen bakat sinah jaen ebene sawireh jadma muda. Keto kenehne Dadong Raksasa. Sambilanga ngantosang, ia ka sember ngalih yeh, ngilangin bedak. Ditu ia negak di tuwed nyuh, tongosne Ni Ranjani mengkeb. Di samping semere tongos Dadong Raksasa negak, ada pane misi yeh tur kesinarin teken bulan. Lantas tepukina lawatne Ni Ranjani ada di muncuk punyan nyuhe. Ditu lantas I Dadong Raksasa ngelunin Ni Ranjani apang tuwun. Kewala ia tusing nyak tuwun. Dadong Raksasa lantas mamunyi, Nah lamun nyai tusing nyak tuwun, lakar jeritang I Klabangapit, celeng dadong ane gede galak tur demen ngelumbih. Cit tah kung Klabangapit . Mara amonto, jeg suba nengeng celeng gede, macaling, bulune jering, tur ngelumbih punyan nyuh. Bah lantas punyan nyuhe totonan. Kajagjagin ban Dadong Raksasa, kewala sing bakatanga Ni Ranjani. Tusing tawanga wireh Ni Ranjani makecos ka carang punyan sandat di sampingne. Dugase ento, mara lantas makleteg Ni Ranjani ngelah cicing gede turin gembrong maadan I Gringsing Wayang. Uling duwur punyan sandate Ni Ranjani ngelunin cicingne I Gringsing Wayang apang teka ngutgut celengne Dadong Raksasa. Mara majeritan acepok, saget nengok tur suba nyarag celengne Dadong Raksasa. Celenge lantas mati. Disubane keto, Ni Ranjani ngorahin cicingne ngutgut Dadong Raksasa. Dadong Raksasa kepunga tur tegore kanti awakne telah matatu tur getihne mabrarakan. Dadong Raksasa ngemasin mati. Ni Ranjani lantas tuwun uling punyan sandate. Ia ngalih cicingne tur ngemaekang I Gringsing Wayang teken memene ane suba mati. Sebet Ni Ranjani katinggalin meme. Ia nunas ica apang apang awak memene buin matunggalang tur buin idup. Mara mamunyi keto, dapetanga memene buin idup. Demen pesan atine Ni Ranjani. Bangkene I Raksasa lantas kapaid ka bangbange tur katanem. Keto masih celengne I Raksasa katanem. Ngawit uling totonan sayan-sayan sayang Ni Ranjani teken cicingne ane maadan I Gringsing Wayang, keto masih memene. Kasuwen-suwen mapitutur memene teken Ni Ranjani. Luh, nyai suba ngancan kelih, melahang ningehang tur resepang pabesen anak len. Apang tusing ulian pelih nampi pabesen lakar nepukin baya buka jani.
In Indonesian
Enable comment auto-refresher