TAT TWAM ASI Indonesia inggih punika silih tunggil negara kepulauan sane pinih ageng, indik puniki sane ngawinang Indonesia dados negara sane sugih antuk pabinayan. Nyantos warsa 2010, wenten langkung saking 1300 suku bangsa, wenten 718 basa lokal, miwah agama sane kaanut oleh krama Indonesia akeh pisan. Sekadi pedang sane madaging mata kalih, pabinayan puniki wantah arta brana sane dados daya tarik Indonesia ring dura negara. Sakewanten, pabinayan puniki taler ngawinang konflik. Sekadi sane kabaosang ring Pancasila sila kapartama Ketuhanan yang Maha Esa , sane mateges bangsa Indonesia bebas ngamargiang agama lan ngamargiang ibadah sane manut ring ajah-ajahan agama soang-soang, toleransi lan saling hormat majeng ring agama tiosan. Nanging ring Indonesia, agama inggih punika silih tunggil pikobet sane pepes ngawinang konflik, ketahnyane kakawitin olih pabinayan pamineh utawi salah paham. Puniki wantah pikobet sane ngawinang jejeh. Iraga patut uning, mungguing Indonesia wenten akeh agama. Pinaka bangsa sane ngajegang persatuan lan kesatuan, iraga patut ngrereh solusi. Ring filsafat Hindu inggih punika Tat Twam Asi sane mapiteges iraga sareng sami pateh. Paurukane matetujon mangda iraga setata tresna asih ring anak lian yadiastun mabinayan agama. Malantaran ngresepang ajah-ajahan Tat Twam Asi, manusa pacing prasida ngrasayang abot miwah ingan urip puniki. Conto nyane ring Bali, silih sinunggil wewidangan sane madue toleransi pinih becik. Yadiastun akehan kramane nganut agama Hindu, nanging agama tiosan kantun prasida ngamargiang ibadah manut kepercayaan ipun. Niki mawinan masyarakat ngagem ajah-ajahan Tat Twam Asi, samian dados semeton. Yadiastun mabinayan, iraga tetep saling ngajiang, lan saling tulung. Pamuputnyane, yadiastun iraga mabinayan agama, iraga patut tetep toleransi inggih punika nganggen ajah-ajahan Tat Twam Asi ring kahuripan soang-soang. Yening ajah-ajahan puniki prasida kemargiang, sinah kahuripan puniki pacing dados harmonis, saling ngajiang, lan setata santi.
Enable comment auto-refresher