Summary
In English
In Balinese
Di alase wayah ane lintang madurgama tur serbi, liu ada beburonan nongos ditu. Punyan kayune tegeh-tegeh tur gede-gede, majajar saling kuubin ajaka punyan tiing gesinge ane bet ngriung tur punyan gegirang ane madui mangan-mangan. Ada masi punyan jaka, celagi, teep, bayur, muah punyan biu, mekejang pada mabuah nged-nged. Ane dadi ratu di alase tuah ia I Macan Poleng. Awakne gede, magigi mangan tur macaling renggah, makuku mangan, buina gelurane ngae beburon ane lenan jejeh tur takut. Makejang isin alase nyeh ajak I Macan Poleng sawireh ia sesai pesan ngamah beburon ane cenik-cenik. Sabilang ada beburon ane liwat ditu di alase, setata matianga laut amaha. Makelo-kelo liu burone jejeh ngliwat di alas wayahe ento. Kacerita I Macan Poleng ngalih tetedan mailehan. Uli semengan kanti sanja tusing ada buron ane tepukina sawireh makejang pada malaib ngungsi alas ane lenan. Dadi, makenta I Macan Poleng tusing ngelah amah-amahan. Bas kaliwat layah basangne, laut I Macan Poleng ngojog tongos ane liu misi punyan celagi. Biasane ditu ada dogen panak celeng clapa-tclapat. Yen ada, sinah lakar matianga tur amaha. Keto pamineh I Macan Poleng, laut majalan srayang-sruyung, lemet batisne ulian makenta uli semengan. Suba jani teked di tongose ento, dapetanga suba liu ada kucit maplayanan saling uberin. Ngetel kanti paesne I Macan Poleng nepukin kucit liu. Nah jani suba lakar kasagrep, payu jani ngamah, keto munyine I Macan Poleng. Makecos ia nyagrep kucit ane paling mokoha, tur besbesa basangne, cereta getihne, laut amaha. Kucit ane lenan malaib pati silib takut katadah ban I Macan. Kucite amaha kanti telah kayang ked tulang-tulangne. Ada lantas kucit malaib tur masadu teken para wadua burone di tengah alase, ngorang ada macan ngamuk tur ngamatiang timpal-timpalne. Makejang burone ane ningehang pada jejeh sawireh I Macan Poleng tusing ada ane bani nandingin. Kenkenang abete jani, apang alase dedeg rahayu, tusing ada I Macan ane sesai ngae duhkita. Jani masaut I Bojog Ireng. Eda sangsaya Jani icang lakar nyiatin I Macan Poleng sawireh suba liu masih burone ane matianga. Mara keto munyine I Bojog Ireng, masaut lantas I Kidang, Wih Cai bojog, kaden Cai aluh nyiatin I Macan Poleng? Kadirasa I Kebo ane ngelah tanduk sakti, tusing bani ngarepin, sawireh ia ngelah kuku tur caling mangan, awakne gede ganggas, tur bayunne siteng. Sing buungan Cai lakar mati. Bah, I Kidang mula getap. Sing bani masiat, mendep suba, eda Cai bani nungkasin isin keneh icange keto I Bojog ngraos. Kasautin ban I Kidang, Aduh Cai Bojog, apa Cai tusing mapineh malu mamunyi? Kaden Cai awak Caine nyidang ngalahang I Macan ane gede siteng totonan? Yen nglawan malaib-laiban, sinah I Macan ane menang. Apabuin matanding masiat, kudang buron kaden suba ngemasin mati ulian macentok ajak I Macan Poleng. Ane mati to, I Kucit ane tusing ngelah bayu tur sing saja ririh. Ane jani, awake ane lakar kemu ngarepin I Macan, eda suba sangsaya teken icang. Dugase malu, leluhur icange ngempel pasih ngae kreteg Titisubanda, mapitulung tekening Ida Sang Rama, ngentasin pasih ditu ngungsi jagat Alengka. Nyiatin para raksasa sakti-sakti, makejang mati. Keto nyen saktin bojoge apang Cai tatas nawang. Keto munyin I Bojog ireng, nigtig tangkah marasa teken awakne ririh tur sakti. Lantas macruet makecos sambil nyerit nyagjagin tongos I Macan Poleng medem. I Bojog nyagjag sada ngejengit ngedengang giginne ane mangan, merasa teken awakne ririh, ikuh I Macan Polenge paida. I Macan makesiab nepukin bojog cekah saha nyerit nagih masiat. Enggal ia bangun, laut mabalik ngambis awak bojoge tur kaentungang. Patiluntang, awak I Bojoge ketes tur makaplug di batune. Awakne sakitanga, telah benyah, konden maan amongken mangkihan, I Macan Poleng nyagrep I Bojog, basangne besbesa, getihne mebrarakan di tanahe. Payu I Bojog Ireng ngemasin mati ulian marasa teken awakne andel tur ririh. Konden taen nawang lebah tegeh, marasa suba sakti tur kuat, cara senggake, gangsaran tindak kuangan daya. Ortan I Bojog ngemasin mati masiat nglawan I Macan Poleng, suba rame di alase. Onyangan isin alase, jejeh tur mapangenan ulian matine I Bojog. To mahawinan, lantas I Kidang mamunyi, Ne suba ane takutin idewek jani. Kaden suba saja sakti, kaden saja ia ririh, Sada nagih masiat nglawan ratun alase, buka ia I Macan Poleng. Masaut lantas I Rase, Men kenkenang jani abete madaya? Dingeh icang di tanggun alase sisi kangin, telah suba burone tadaha ban I Macan Poleng. Sinah lakar sing ada buin buron ane idup jani, yen terus buka kene. Kacerita jani I Kidang lantas mekeneh-keneh ngekadaya, lakar ngamatiang I Macan Poleng. Masaut lantas I Kidang, Ih Cai Angsa ajak dadua, Cai setata nongos ditu di tukad tanggun kangine. Jani mapan yeh tukade buin nyat, bin kebek, bin pidan sujatine yeh tukade kebek tur ening, ditu icang lakar ngekadaya bakal ngepet patinne I Macan Poleng. Masaut I Angsa, Yen unduk yeh tukade, bin limang dina uli jani, tukade pasti kebek, ditu yeh tukade jeg pasti ening. Nah yen suba keto, kayang totonan, icang lakar ngekadaya buin, apang nyidang I Macan Poleng mengamasin mati, keto pesautne I Kidang, lantas sarwa burone pada mulih. Gelisin satua, suba panumaya limang dinane teka. Makecos I Kidang ngalih tongos I Macanne medem. Disubane bakatanga, I Kidang nyeritin I Macan Poleng, Ih Cai Macan. Ngudiang Cai ditu medem dogen, apa Cai tusing sebet, yen ada macan lenan nguasa dini di alase wayah? Mara keto dingeha munyin I Kidange, laut bangun I Macan Poleng masambilan masaut bangras. Wih Cai Kidang, apa orang Cai busan? Pang Cai nawang, icang suba ratun alase, kuasa ken sarwa buron di alas wayahne. Buin nimbal I Kidang, Ane pidan to orang Cai. Ane jani suba ada macan ane lenan, aengan ken Cai, gedenan teken Cai, ane sitengan tur ngelah kasaktian luihan teken Cai. Macane ento suba jani dadi ratun alase dini di alas wayah. Mara keto dingeha ken I Macan, saha galak ia masaut. Marasa dewekne jani katunan teken macan ane lenan. Yen saja cara munyin Caine, uli dija macanne ento? Apa ia uli alas joh mai, kalapu-lapu ngungsi alase dini, tur dadi ratu? Apa ia sing matolihan, sawireh dini ada icang ane kuasa? Nah Cai Kidang, jani ajak icang kema ka tongos macanne ento, apang tawanga, lakar siatin icang jani, pang sepalanan, bangka tendasne. Nah mai tugtug jani icang Keto I Kidang masaut. Kacerita I Macan Poleng nugtug I Kidang uli duri. Palaib I Kidange jeg becat pesan, I Macan kanti sengal-sengal nguberin. Disubane teked di sisin tukade kangin, ane yeh tukade sedeng kebek, ditu mareren I Kidang tur mamunyi. Nah dini suba ia nongos di beten tukade. Ada macan gede sajan, yen Cai sing ngugu, tegarang ja tolih Kacerita jani suba teked di sisin tukade tur masaeban ia nengok, tepukina lawatne pedidina di yeh tukade. I Macan ngaden lawat ibane ento macan ane lenan, ane oranga teken I Kidang. Jeg sahasa makecos I Macan nyagrep lawatne padidi. Dadi anyud I Macan, ngelur katulung-tulung, sing ada ane ngerunguang. Cendek satua, I Macan anyud tur mati dadi pakelem di tukade. I Kidang lega pesan atinne nepukin I Macan suba mati. Kacerita makejang lantas masuryak nyagjagin I Kidang. Sawireh suba misi pangacep I Kidang muah sarwa burone di alase wayah. Pamekasne, alase ento trepti jani, makejang sarwa burone hidup rahayu, tusing takut buin teken I Macan Poleng.
In Indonesian
Enable comment auto-refresher