Om Swastiastu. Sadurunge titiang ngaturang teks orasine puniki, ngiring ja iraga sareng sami ngaturang rasa angayubagia majeng ring Ida Sang Hyang Parama Kawi, riantuk sangkaning sih pasuecan Ida. Titiang Ni Kadek Diah Ayu Paramitha saking SMA Negeri 1 Kerambitan, jagi ngaturang teks orasi sane mamurda Ngamolihang Kasejahteraan Sosial ring Bali .
Pamimpin inggih punika anak sane madue pangaruh ring anak tiosan mangda prasida ngamargiang tetujon sareng sami. Punika mawinan, pamimpin madue swadharma nyangkepin miwah ngamargiang sakancan aspirasi kramane, taler madue tanggung jawab majeng ring karahayuan kramane utawi kasejahteraan sosial. Ngeninin indik kasejahteraan sosial, kasejahteraan punika prasida kacingak saking makudang-kudang aspek, sekadi ekonomi, pendidikan, kesehatan, miwah sosial-budaya. Mangkin, titiang jagi maosang indik kasejahteraan sosial ring Bali saking sisi ekonomi. Silih sinunggil pikobet ekonomi ring Bali inggih punika kesenjangan ekonomi, sane patut pisan karerehang panepasnyane. Kesenjangan ekonomi puniki mapaiketan pisan ring kawentenan pawangunan infrastruktur sane kantun nenten seimbang ring soang-soang daerah. Puniki prasida ngawinang urbanisasi krama sane magenah ring desa-desa magingsir ka kota sane raris ngawinang pertumbuhan ekonomi ring Bali nenten asah. Angka kemiskinan miwah pengangguran taler patut kauratiang pisan, sawireh yening kacingakin penyaluran subsidi majeng ring krama menengah ke bawah punika kantun durung tepat sasaran, sane ngawinang angka kemiskinan durung nyihnayang pauwahan sane signifikan.
Nenten wantah punika, sakadi sane sampun kauningin, Bali kuat pisan santukan kawentenan pariwisatane, tur kantos mangkin pariwisata sampun ngamolihang kawigunan sane akeh ngantos 60 saking struktur ekonomi Bali. Yening sekadi titiang, nyiagayang genah pariwisata sekadi puniki, utaminnyane ring desa-desa, prasida dados silih tunggil panepas sajeroning ngungkulin kesenjangan ekonomi ring Bali, sekadi program Desa Wisata Tengenan, Jatiluwih, Terunyan, miwah sane lianan. Nanging, iraga nenten ja prasida narka napi sane jagi mamargi ring galah sane jagi rauh, sekadi wabah Covid-19 ring warsa 2020 sane raris ngreredang panglimbak ekonomi, utaminnyane ring Bali sane kantun ngandelang pariwisata. Nanging, yening selehin malih sujatine Bali madue potensi sane lianan, umpaminyanne UMKM. UMKM puniki sane sepatutne kauratiang pisan mangda sayan ajeg. Pamimpin Bali madue peran ring sajeroning ngwantu para UMKM ring Bali mangda prasida nincapang panglimbak ekonomi Bali, sekadi ngicenin fasilitas lan wantuan sekadi edukasi, sosialisasi, subsidi miwah awig-awig sane prasida nyokong kewentenan UMKM miwah ngicenin perlindungan hukum majeng ring pelaku UMKM. Sawireh UMKM punika nenten ja prasida ngwantu perekonomian bali kemanten, nanging taler prasida nincapang kasejahteraan parajanane santukan prasida nyiagayang lapangan pakaryan majeng ring krama Baline. Kasejahteraan sosial sujatine nenten ja tanggung jawab pamimpin kemanten, nanging tanggung jawab parajanane sami. Sakewanten, peran para pamimpin ring iriki mabuat pisan sajeroning nuntun parajanane ngamolihang kasejahteraan sosial. Sang pamimpin patut ngunayang sabecik-becikne sumber daya, saha ngwangun wewangunan sane becik mangda prasida ngamolihang karahayuan pabuat rakyate.
Wantah kadi asapunika teks orasi sane prasida aturang titiang. Yening wenten atur titiang sane nenten manut ring arsa lan sesuduk basa, titiang nunas geng rena pangampura, pinaka panguntat puputang titiang antuk paramasantih, Om Santih Santih Santih Om.
Enable comment auto-refresher