Summary
In English
In Balinese
Ada tuturan satua I Semut teken I Nyawan ane nongos di alase jimbar. Uli cenik ia makadadua saling tulungin, saling asihin, keto masih bareng ngalih amah-amahan mapan pada-pada demen teken ane sarwa manis. Disubane kelih, I Semut patut nulungin kulawargane mupulang amah-amahan anggona bekel ri kala masan dingine teka. I Semut mula buron ane jemet pesan magae tur demen magotong royong. Keto masih I Nyawan, sesaian makeber ngindang nuju sekancan bunga ane nedeng kembang. I Nyawan mula alep, sabilang lakar ngisep sarin bunga, ia satata matari malu teken bungane. Sarin-sarin bunga totonan nyanan dadianga madu baan I Nyawan tur kasimpen di umahne. Kacrita sedek dina anu, gumine nemu masan dingin. I Semut teken timpal-timpalne sedeng iteh ngarag-ngirigang bekel amah-amahan di song umahne. Ane jani umah I Nyawan srayang-sruyung kaampehang angin di tongose tegeh. I Nyawan ngenggalang pesu menahin bongkol umahne ane magantung, apang tusing ulung uli punyane. Makekeh ia menahin umahne, tusing tawang uling dija kaden saget teka angin nglinus ngusak-asik. I Nyawan das-dasan kena angin nglinus, nanging ia maan selah mengkeb di bongkol carang punyane. Yadiastun nyidang makelid, nanging lacur umahne I Nyawan kakeberang baan angine totonan. Sebet pesan kenehne I Nyawan kelangan umah. Suba makelo ia mupulang madu, saka besik matari teken bunga-bungane, nanging jani disubane mapupul jeg ilang tusing ada masisa. Jani I Nyawan marasa seduk kewala ia tusing ngelah apa-apa. Buina ia tusing mampuh ngalih amah ulian suba leleh ngaepin angin baret ituni. Ia negak nyleleg di bongkol punyan gede sambilanga mapineh-pineh ngalih selah apang nyidang ngamah. Ri kala mapangenan, I Nyawan nepukin I Semut mara pesu uli song umahne. Ditu galang kenehne I Nyawan tur mabudi lakar ngidih amah-amahan. Ngegarang bayu I Nyawan ngaukin I Semut sambilanga majalan, Semut... semut... I Semut maekin I Nyawan laut mamunyi, Enken Nyawan ? Adi jeg lemes buka keto cai ? Anak kuangan apa roh? cara biasane I Semut ngenyorin I Nyawan. Masaut lantas I Nyawan sambilanga ngetelang yeh paningalan, Umah.. umah icange ilang kakeberang baan angin baret huhuhu.... Jani icang tusing ngelah umah, tusing masih ngelah amah-amahan. Dot pesan icang ngisep sarin bunga, nanging kampid icange suba tusing mampuh makeber. Jani icang lakar ngidih tulung ajak cai, baang ja icang ngidih amah-amahan nang abedik. Apang payu dogen liwat dinane jani. Buin mani icang buin lakar mautsaha ngalih amah-amahan padidi. I Semut marasa padalem nepukin timpalne kena bencana buka keto. Nanging rasa pedalemne ngenggalang ilang disubane inget teken jani sedeng masan dingin, ia nyeh tusing pekpekan maan ngamah yen ngemang I Nyawan ngidih. I Semut mentingang kulawargane apang tusing kuangan amah-amahan. Masan jani keweh pesan ngalih amah. Yen I Nyawan baang ngidih, nyanan cang sing maan apa. Konden buin amah-amahane suba pada-pada mabagi rata apang semut lenan maan. buka keto kenehne I Semut. Ento mawinan ia masaut buka kene Ih Nyawan, icang suba kaukina ngajak reraman icange di tengah. Cobakin ditu alih-alihin di bongkol punyan lad umah caine, nyen nawang nu masisa ketelan madu ditu. I Nyawan kamemegan ningeh munyin saklek I Semut. Ia tusing madaya timpalne tusing ngelah rasa pedalem buka keto. Ngangsehang masih I Nyawan majalan nuju bongkol punyan tongos umahne magantung ipidan. Ditu ia nyelepang sisan ketelan madu. Ento kangguanga malu anggon ngisinin basang seduk. Di tengah rasa sebet, I Nyawan ngeka daya lakar ngemang I Semut paplajahan ulian bikasne ane tusing ngelah pangrasa. Kacrita jani kampid I Nyawan suba dadian, ia lantas makeber ngalih sarin-sarin bunga tur ngae umah di bongkol punyane. Magimeh ia nyelepin saka besik bunga dinane totonan apang enggal nyidang mupulang madu ane liu. Uli kangin ngauhang, uli kaja ngelodang, luas, singgah ka bunga-bunga ane nedeng kembang. Sabilang I Nyawan inget teken munyin I Semut, tangkah I Nyawan engsek. Nyansan inget teken unduke totonan, nyansan jengah tur gresiuh ia mupulang madu. Suba aminggu ia mupulang madu, suba atekor ia ngelah madu di bongkol punyane. Amone suba kangguang neh. Mani jeg rasaang cai I Semut, tusing ja nyidang buin cai makiba. Rasaang sebetne tusing ada ane nulungin cai dikewehe. Jani suba teka dinane I Nyawan mancingin kenehne I Semut. Ri kala I Semut teken panyamane sedeng mapupul tur iteh ngorta, I Nyawan ngliwatin I Semut mapi-mapi ngetelang madu di arep I Semut. Suba kanti ping telu I Semut nepukin I Nyawan ngulungang madu ngaenang pesu dayan corah I Semut. Ih luas acepok dogen suba liu pesan I Nyawan nyidang makatang madu. Dija jani umahne I Nyawan nah? I Semut mamunyi di kenehne sambilanga nuutin ketelan madu di tanahe. Mara majalan neked di bongkol punyan gede, I Semut kepingon nepukin blungbang ane misi madu nanging tusing ada nyawan ane nyaga madune totonan. Ngenggalang I Semut majalan mulih ka song umahne laut mupulang makejang nyamane paturu semut. Nguda cai gageson keto macelep ka song umahe ? ada nyamane ane mamunyi cara keto. I Semut masaut Nyaman-nyaman icang ajak makejang, mai malu mapupul. Ada ane lakar ortaang abedik. . Sambrag nyaman-nyamane maekin I Semut. Mamunyi lantas I Semut Kene meme, bapa, bli, muah mbok... Tuni icang maan nepukin madu liu pesan di bongkol punyan gede. Buina tusing ada nang abesik nyawan ane nongosin madune totonan. Icang ngelah daya, buin mani das lemahe, ajaka bareng-bareng kemu ngalih madu. Ajaka kajang madune totonan ka umahe dini. Apang iraga pekpekan maan ngamah di masan dingin buka kene. Enken asane ? Cocok ? . Ada lantas nyamane mamunyi Ah dija ada unduk madu sing tongosina baan nyawane... . I Semut masaut bangras Nah yen cai tusing pracaya, ngoyong gen jumah. Ane dot nawang, jalan mani das lemahe tuutin icang. Buin manine, ngedas lemah I Semut suba nundun panyamane. Saka besik pesu uli song umah mabaris rapi nuju bongkol punyane. Disubane neked di bongkol punyan, makejang semute dangkrak-dingkrik baan liangne nepukin madu liu. I Semut lantas mamunyi Neh icang suba ngorang dini ada amah-amahan liu. Jani enggalang kajang madune satonden I Nyawan nepukin. . Makejang tusing nyak saling pabedikin nyemak madu apang enggal ngajang ka song umahe. I Semut muah panyamane pada-pada ngrunyung madu totonan. I Nyawan ane uli tuni suba ngintip di carang punyane kenyem-kenyem nepukin I Semut suba macelep ka pangindrajalane. I Semut ngangsehang ngebekin basangne aji madu, kanti bibihne kembung ngemkem madu. Ulian baas liu basang muah bibihne misi madu, jani batis I Semut leklok tusing nyidang majujuk apa buin majalan baan baatne ngaba awak. Suba mresekang pesan I Semut ngleserang batis nanging ia tusing masih nyidang majujuk. Nyaman-nyamane ngenggalang nulungin I Semut. Nanging lacur, tileh masih ia tusing nyidang majujuk. Buina nyaman-nyamane maserod tur ulung ka blungbang madune laut mati ulian kelem. Tusing ada nang abesik nyamane ane enu idup. I Semut nyansan paling, ia mesuang madu di kemkemane tur mautsaha ngutahang madu di basangne apang enggal magedi uli tongose totonan. Nanging lima batis I Semut suba telah uyak madu. Ento ane ngranaang ia tusing nyidang magedi krana batisne supa pada-pada neket. Limane I Semut masih tusing nyidang nyujuh tongos lenan anggo magisiangan. Nyansan paling I Semut lantas makraikan Tulungg... tulung... tulung... sambilanga ngeling. I Nyawan pesu uli tongosne mengkeb tur makeber ngliwatin I Semut ane sedeng nandang lara. I Semut ane nepukin I Nyawan liwat lantas makaukan Nyawan... Nyawannn.. Tulungi icang, tulung.. tulungg.. . I Semut suba tusing buin nyidang makiba, batis-batisne neket di madune. I Nyawan makeber maekin I Semut tur mamunyi Aduh adi kakene lacur idup caine I Semut ? Kaden suba pekpekan maan ngamah, adi enu masih sengsara. Telahang suba madun icange makejang. Icang nu nyidang ngalih sarin-sarin bunga ane lenan. Adeng-adeng nelahang madune nah. Icang lakar luas malu... . Tusing buin ngantiang I Semut masaut, I Nyawan ngenggalang makeber nambung ngalih tongos anyar anggona ngae umah buin. Pamuputne, I Semut mati ditongose manis. Keto suba upah anake momo cara pajalan I Semut. Ia nemu sengkala diliange. I Semut tusing bani makidiang nang abedik teken I Nyawan, nanging ngedotang apang satata liu maan ngidih. Sujatinne yen iraga ngemang anake ngidih, tusing ja ngaenang iraga kuangan. Keto masih anake ngidih, patut nerima tur ngajinin anake ane suba mapunia. Buina yen iraga lakar nulungin anak, tusing dadi milih-milihin kulit. Yadiastun ia tusing manyama teken iraga, patut masih saling tulungin.
In Indonesian
Enable comment auto-refresher