Summary
In English
In Balinese
Ada katuturan satua Ida Raden Mantri Koripan ngambil rabi ka Singasari. Makelo-kelo Ida Raden Galuh Singasari, rabin Ida Raden Mantri Koripan lantas mobot. Duang tiban makelon idane mobot lantas embas putranida lanang, nanging marupa naga. Dening keto osek pesan pakayunan Ida Raden Mantri, ditu lantas ida ngandikaang parekanida, ngaturin Ida Pranda apang parek ka puri. Gelising satua, suba Ida Pranda parek ka puri, ngandika Ida Raden Mantri, Inggih Pranda, awinan titiang ngaturin Pranda sakadi mangkin, tan wenten tios, titiang nunasang santukan pianak titiange marupa naga. Asapunapi mangkin antuk titiang. Kenak Pranda mangkin mamaosang. Inggih Ratu Raden Mantri yan kariang di negara, janten mamanesin jagat, ngawinang jagate rusak. Becikan putran Cokor Ratu kutang ring gunung Wiryadana, tur wastanin putran Cokor I Ratu punika I Naga Kiles keto atur Ida Pranda, kapisinggih antuk Ida Raden Mantri, tur ida lantas ngandikaang parekane ngae peti, lakar anggen ida wadah putrane. Gelisang satua pragat suba petine, lantas I Naga Kiles kawadahin peti, tur kapangandikaang panjake ngutang di gunung Wiryadana. Tan kacrita di purian, kacrita I Naga Kiles disubanne makutang di gunung Wiryadana, lantas mireng sabdan Betara Guru, kene pangandikanne, Cai Naga Kiles, pagehang ibane dini miasa, makelonne abulan pitung dina, keto pangandikan Betara Guru. Kacrita I Naga Kiles mara miasa pitung dina, lantas keles kulesne, dadi manusa bagus. Kacrita jani Ida Betara Guru ngraos tekan arinida, kene pangandikanne, Adi ane buin abulan jani ada lakara anak parek mai teken Beli. Ento panak I Barake uli di Mercapada. Matur arinida, Inggih Beli, makawinan wenten jadma sakeng Mercapada, sapunapi kabuatanipun? O, kene to Adi. I Raden Mantri Koripan ngelah panak magoba naga. Krana ngelah panak naga, saking Beli mastu i maluan. Jani I Naga kutanga di gunung Wiryadana, ditu ia miasa, apang ia dadi manusa bagus, keto pangandikan Ida Betara Guru. Jani kacrita I Naga Kiles suba tutug yasanne abulan pitung dina suba dadi manusa bagus lantas I Naga Kiles ka peken Dahane meli kasa putih, menyan muah bunga aji telungatus keteng. Disubanne suud mablanja lantas malipetan. Nuju purnama I Naga Kiles lantas masep, malepug andusne neked ka suargan. Ditu lantas saluka buin kulesne tur lantas majalan nuut andus. Suba I Naga Kiles neked di suargan, di jabaan lawangan Ida Betara Guru, ditu lantas ia ngokok. Tengkejut panunggun lawangane, reh tumben ada naga kema. Ditu lantas i panunggun lawang ngenggalang matur teken Ida Betara Guru. Ngandika Ida Betara Guru, lh cai panunggun lawang kenken ules nagane di jabaan, lamun majanggar mas matlatah mas, tunden mai parek tekening nira keto pangandikan Ida Betara Guru, buin panunggun lawang ka jaba medasin nagane. Dening nagane majanggar muah matlatah mas, lantas I Naga Kiles parek ka purian. Di subanne teked di puri, ngandika Ida Betara teken I Naga, Ye Cai Naga Kiles, apa tunas cai mai? Matur I Naga Kiles, Inggih Paduka Betara, yening Paduka Betara sueca, titiang mapinunas mangda titiang marupa manusa bagus. Tuah amonto pinunas I Nagane, ngandika Ida Betara Guru, Nah keto ja pinunas caine, nira ngisinin. Nah selerang layah caine Seleranga kone layahne I Naga, lantas rajaha teken Betara Guru, dadi lantas I Naga manusa bagus. Dening suba dadi manusa, lantas kasalinin adan, kaadanin I Wiryadana, tur kaicen ali-ali panca wareg. Nah cai Wiryadana, ne nira maang cai bungkung akatih muah manik sakecap. Apa ja tagihin cai bungkunge ne, kasidan. Pragat panugrahan Betarane keto, lantas I Wiryadana mapamit, ngojog gunung Wiryadana. Ditu lantas I Wiryadana ngaji apang ada puri apalebah muah panjak. Ada lantas puri miwah panjak liu pesan. Ditu lantas I Wiryadana nyeneng agung. Ada parekan ida dadua, madan I Smaradana miwah I Smaragati. Di subanne I Wiryadana nyeneng agung, makayun lantas ida marabian ne kamustiang di kayun, sing ja len Raden Galuh Daha. Ditu lantas ida masiluman dadi capung mas, makeber ngungsi Desa Daha, menceg lantas di don andong bange di samping purin Anake Agung. Kacrita jani Ida Raden Galuh Daha ngrereh capung, kairing baan I Nginte Ngemban. Mailehan ida di samping purine, dadi kacingak i capung mas di don andonge, ento lantas kandikaang I Nginte Ngemban ngengket, nanging tusing bakat-bakatanga. Dening keto Ida Raden Galuh lantas ngambil engket, tuah acetetan kekeniang lantas capunge, tur kaambil capunge uli engkete. Sedek ida ngambil capunge lantas ngapirpir kampidne, tur Ida Raden Galuh keberanga. Di makeber capunge ento jeg peteng liget gumine tan pakrana. Dening keto ngeling kone i panyeroan makadadua, tur ngenggalang malaib ka purian, ngaturang unduk Ida Raden Galuh ilang keberang capung. Dadi sungsut lantas Ida Anake Agung lanang istri. Tan kacrita Ida Anake Agung, kacrita Ida Raden Galuh keberang capung suba neked di gunung Wiryadana. Ditu Ida Raden Galuh kalemesin ban Ida Anak Agung Wiryadana. Ida Raden Galuh tan kayun. Dening keto, Anak Agung Wiryadana eling teken panugrahan Ida Betara Guru, lantas kaasuh ali-ali panca wareg. Ento wasuhane kaangen ngetisin Ida Raden Galuh, mawanan kayun lantas ida marabi. Disubanne Ida Anak Agung Wiryadana marabian, lantas ida ngutus parekan dadua ka Koripan ngaturang surat teken ajinidane. Tan kacrita i utusan di jalan, kacrita suba kone teked di Koripan tangkil teken Ida Anak Agung. Disubanne katur surate, lantas kawacen kone munyin surate, Inggih Guru Aji, titiang I Naga Kiles. Saking panugrahan Ida Betara Guru, mangkin titiang sampun prasida marupa manusa, tur titiang sampun ngambil I Galuh Daha anggen titiang kurenan. Inggih yening Guru Aji sueca ring titiang, mangda Guru Aji ngwentenang piuning ring Ida Sang Prabu Daha, mangda sampun ida menggah keto ucapan surate, ledang pesan Ida Sang Prabu Koripan, lantas prajani nyalanang utusan ngaturang surat ka Daha. Ucapan surate, nguningayang buat putrinidane Raden Galuh kaambil baan Raden Mantri Wiryadana. Gelising satua suba katur suratidane teken Ida Sang Prabu Daha, ledang Ida Sang Prabu Daha, lantas ida ngandika teken i utusan, Nah cai utusan, wireh jani nira suba nawang unduk panak nirane, nira tusing ja nyebetang. Sakewala aturang teken Ida Sang Prabu, apang panak nirane bebasanga ane buin telun jani, keto pangandikan Ida Sang Prabu Daha. Mapamit lantas i utusan. Tan kacrita di jalan, kacrita suba teked di Koripan lantas katurang pangandikan Sang Prabu daha keto, mawanan prajanian Ida Sang Prabu lunga ka Wiryadana, kairing baan patih mantri muah panjak, mendakin oka muah mantunidane. Tan kacrita pamargine, kacrita suba ida rauh di Puri Wiryadana kacunduk teken okane. Tan kacrita kaledangan Ida Sang Prabu muah bebaosane di Puri Wiryadana, kacrita jani lakar pamargine bebas ka Daha. I Smaradana, I Smaragati nabdabang panjak-panjak mayasin jaran, joli muah ane lenlenan. Di subanne makejang pragat jani lantas mamargi Ida Sang Prabu, Raden Mantri Wiryadana muah Raden Galuh Daha nglinggihin joli mas. Patih Mantrine nglinggihin jaran. Magredegan pamargine iringang mamas muah gong. Tan kacrita di margi, kacrita suba rauh di Daha, lantas kapendak baan Ida Sang Prabu Daha, masih iringang mamas muah gong magredegan. Kacrita suba ida pada ngranjing ka puri, lantas masukan-sukan tur mabebaosan sing ja len indik Ida Raden Mantri Wiryadana uli alit nganti mamanggih kasukan.
In Indonesian
Enable comment auto-refresher